HRD Minister Javedkar-i Manipur sorkari aitsür

Imphal, October 3 (Agencies): Hombarnü Union Human Resource Development Minister, Prakash Javedkar-i Manipur nung Congress sorkari Centre den meyariteper ta aitsüogo.
Javedkar-ki anogo ana atema Manipur semdangba sülen osangbener den sensaksemdang, “Manipur sorkari meyartepba ajanga sports university meyangluteter aser NH 37 tajungba mekümteter” ta ashi.
Terenlok atema mapa nung Congress sorkari teinyaktsü tim meinyakba pai yimjak nung metetdaktsütsü, ta Javedkar-isa shisem.
Sports University meyanglutetba atema Chief Minister, Okram Ibobi Singh aija jembidang Javedkar-i ashiba agi, state sorkari ali peria agütsüogo ta jembiaka ali magütsü aser ano ali kibur kari okadak iba asoshi ken o benoka lir.
Prime Minister Narendra Modi-i NDA sorkar tenteter mezüng anogo 100 tsüngda NH-37 yanglushitsü ta nangzük saka tang tashi iba lenmang mejungi lir. Makru ayong ajangdanga yangluba apu nung mesenzütetba agi truck gari 1,000 jungnüa anendena lir, ta paisa shisem.
“Gari lenmang yanglushitsü atema tenders metetdaktsüogo saka state sorkari meyariteper. NDA sorkaribo Imphal den sendaktepa NH 37 ya kanga junga yanglunür aser linük nung mountain highway tajungtiba rongnung ka kümdaktsütsü bilemer” ta Union Human Resource Development Minister-isa metetdaktsü.
“State sorkari meyaritepba bushisüngdangtsü atema kobi melii high-level team ka Manipur-i arutsü. Congress ministry ajanga tim mesüi inyakba mapatem onoki jungkai adoka sayutsü” ta paisa shisem.
Javedkar-isa anogo 15 shia pai Imphal-i arutsü aser terenlok mapa inyakbatem reprangshimtsü ta osang metetdaktsü.