Kiralongraba nung arrtsü telemsa mali: Adnan Sami

New Delhi, October 3 (Agencies) : Jammu & Kashmir nung Line of Control nung India nunger sepaitemi kiralongrar aliba tesemtem amakba atema kentener Adnan Sami-i tawa tu Twitter ajanga sepaitem nem tenüngsang agütsü, saka nisung aikati pa aitsü.
“Iba tweet ji kü mulungjang nungi adok aser ni aitsürtem nem ni tatok agütsür. Kiralongraba nung arrtsü telemsa mali” ta pai India Today Safaigiri Awards 2016 nung jembidang ashi.
Adnan ya Pakistan nungi lir saka pa tangbo India senso kümogo.
Twitter nung Pakistan nungertemi pa aitsüba atema Adnan-i ashiba agi, “parnoki kiralongrar aser Pakistan tsüngda tebendang memetet.”
“Shirnok amak ta masü saka kechiba amak ta asüba jiang asenoki bilemtsüla. Iba ya litsü rakzüktsütsü atema masü saka kiralongrartemi amakba atema meyiptsüba liasü. Kiralongrar tesep amak” ta Adnan-isa shisem.
“Kiralongraba nung arrtsü telemsa mali. Kiralongrartemi Mumbai, Peshawar aser Paris amak” ta paisa metetdaktsü.
“9/11 amakba mesüra, Paris mesüra Taj amakba ajak nung alima tesem balala nungi nisungtemi mangyimogo. Pakistan nung school tanurtem amakdang, asenok ajaki jashi kechiyong linük balala ta asüba tangatetba masü saka tanur taküm samatsüba atema ang asenoki shishia bilemtsü” ta Adnan-isa metetdaktsü.
Taküm küm tetenzüklen Adnan-i Indian citizenship kulikaket angu aser paisa ashiba agi, pa tetsü, tenu aser jabasotem ajak Pakistan nung lir.