India aser Bangladesh nati arrtsü nung atsü tasen atsütsü bangjem

New Delhi, October 04, 2016: New Delhi nung 43buba BSF-BGB Director General level ‘Border Coordination Conference’  nung BSF DG, K K Sharma-i Bangladesh Border Guards DG, Major Gen Aziz Ahmed den kulikatet melentepba noksa nung angur.

New Delhi, October 04 (Agencies): Arrtsülen ozüng alema  inyakba mapatem nokdangtsü aser nüburtem anisüngzüka alitsü atema India aser Bangladesh nati yimtsüng 250 tesem nung atsü tasen atsütsü bangjemogo.
Border Security Force (BSF) aser Border Guard Bangladesh (BGB) na director general senden nung iba telemtetba agia liasü.
BSF tongti, KK Sharma aser BGB DG Major General Aziz Ahmed na o lemtepa tezüngzüktep agiba sülen Sharma-i, “Tang aliba atsü anasa aliba yimtsüngtem nung International arrtsü sülen atsü tasen atsütsü atema telemtetba agiogo. Ibaji ajanga arrtsülen ozüng alema inyakba mapatem aser shibelenba nokdangba den külemi arrtsülen alirtem mulungjang anisüngzüka alitsü. Bangladesh sorkar aser BGB-i ibaji inyaktsü atema onok nem temelaba agütsüogo,” ta ashi.
Pai ashiba agi, iba telemtetba ajanga International arrtsü atsü anasa yim 148 aser anasa aliba yim 137 ajangzüktsü.
“Item yim timbaka West Bengal nung lir, aser yim kar Bangladesh den arrtsüa aliba state tem nung lir,” ta Sharma-i ashi.
India aser Bangladesh DG napronglai, iba senden nung kiset shiruru shibelenba aser sen taila, Fake Indian Currency Notes (FICNs) onük lemtepogo, ta paisa ashi.
India aser Bangadesh na arrtsü kilometer 4,096 lir aser tan senden ya 43buba DG senden liasü. 1975 küm nungi iba senden ya küm nung khen agia liasü saka 1993 küm nungibo küm nung senden anaben amener.