17buba NSF Martyrs’ Memorial Trophy osang

Kohima, October 4 (TYO) : Angami Students’ Union-i “Goal for Peace” omen nung ajemdaker Kohima local ground nung ayongba, 17buba NSF Martyrs’ Memorial Football asayamong nung Nagaland University Kohima Campus, Ziekezou Sporting Club, P Vizheto Football Club aser Nagaland Police (Blue) teloktemi pei asayaba telok madak takok ngua tanabuba round-i iogo.
Mezüng asaya nung NU Kohima Campus-i 2-0 agi Dahou United madak takok angu aser goal anapronglaji minute 25 aser 70 nung Keyiculeung-i yok.
Tanabuba asaya Ziekezou SC aser Pfosemi FC na asaya aser lemzüktsüba mapa den mapang talila apuloktsür asayaba mapang telok katia goal meyoktetba ajanga penalty metsütep. Penatity metsütepdang Ziekezou SC-i 4-2 agi akok.
Tasembuba asaya P. Vozheto FC-i 5-0 agi Tsosinyu FC madak takok angu. Iba asaya nung A. Lalrintluanga-i goal asem yokba ajanga iba asayamong nung hat trick yanglur nisung 7buba kümogo. Pai minute 18, 34 aser 66 nung item goal asemji yok. Iba den külemi Kaqhevi aser Agangpu natia  minute 27 aser 35 nung goal kaka yok. Iba asaya nung Sohilo Kent yellow card agi merenshi.
Tanü asoshi tesüsabuba asaya nung Nagaland Police (Blue)-i 5-0 agi PK United FC Viswema madak kanga junga takok angu. Iba asaya tenzüker minute ana nung Ruokozhazo Keyho-i Nagaland Police atema mezüng goal yok aser iba sülen Muluvotuo Rhakho o Imsumanen natia goal kaka yok. Tanüngba goal anaji minute 28 aser 60 nung Lamphong Aomeshu-i yoka iba takok angu.
October 5, 2016 nü AYO “A moment of solidarity to enable our environment” sentong aliba ajanga asaya ka danga masayatsü, ajisüaka anepdang 10:00 ako nung tenzüka Local Ground temüket merükteta amongtsü, ta asayamong ayongertemi metetdaktsüogo.