ISIS-i HC obendangertem, yimten lenirtem dak tenük yoker

Thiruvananthapuram (Kerala), October 04 (Agencies): Kerala nung Intelligence agency temi state sorkar dang ISIS den tesentaktep alirtemi High court obendanger ana aser yimtenren lenir kar dak tenük yokba osang metetdaktsüogo.
ADGP Intelligence to Chief Minister aser Home minister, Pinarayi Vijayan-i iba dak sentakba nung report ka agütsüogo, ta police osang ka ajanga metetdaktsü.
Kerala nung lanur 21 samaogo aser parnokji kiralongrar telok, Islamic State nung denner südi ta bilemer, aser iba dak sentakba nung National Investigating Agency (NIA)-i bushisüngdangba mapang Deobarnü Kerala nung linük nung kiralongra inyaktsü asameyanger nisung trok pua liasü.
NIA den Kerala Police, Delhi police aser Telangana police-i parnokji mita repranga liasü, aser par trokji Kozhikode aser Kannur districts nung apu.
Parnok pongu Kannur nung aliba Kanakamala tenem nung senden ka mena alidang apu aser ka Kuttiyadi, Kozhikode nung apu, ta NIA sangdong ka ajanga ashi.
Kerala nung lanur 21 samaba atema NIA-i ken o ka benokogo. Parnok ajakji Afghanistan nung ISIS nung adenba sülen Syria aser tanga linüktemi ogo ta bilemer.
Tanü yangi osangbenertem den jembidang DGP, Loknath Behara-i, NIA-i state nung nisung trok apuba sülen state police-i kümkümshia inyakdar, iba den külemi police-i Central agency tem den yaritepa inyaktsü, ta metetdaktsü.