Teyari balaka nüngdakba tanurtem tashi itdaktsütsüla : Yitachu

October 4, 2016 nü Jo Foundation Kohima Parents’ Day nung  Minister Yitachu aser tangartem agiba noksa ka angur.

Kohima, October 4 (TYO) : “Asenoki teyari balaka nüngdakba tanurtem aser senzüka yutsüba nisungtem anepaluba aser nisung ajak atema süoki ia bilemtsüba sülen ang asen loktiliba aintsü,” ta Mongulbarnü School Education & SCERT Minister, Yitachu-i ashi.
Tanü Agri Colony, Kohima nung aliba Jo Foundation nung Parents’ Day sentong nung jembidang Yitachu-i iba olen lemsatep.
“Teyari balaka nüngdakba tanurtem tashi itdaktsütsüla aser iba asoshi JO Foundation-i mapa tajung inyakba atema tenüngsang agütsür.” ta paisa metetdaktsü.
Yisu Khrista indang tesayubatem nung ajemdaker teyari balaka nüngdakba tanurtem renlokdaktsütsü aser parnok jenjang ajungkettsü atema mapa tajungba inyakba atema pelar, ta Yitachu-isa shisem.
Tsüraburtemi item tanurtem shisaliok tajung angazükdaktsütsüla. Asenoki tanur anepalua aser parnok asoshi bilemja mapa inyak nungdang asen loktiliba aintsü, ta paisa tsüraburtem ayongzük.
“Tsüraburtem tasü aittsüla aser tanur nem education system tajung nung tanur anitettsü merangtsüla.
Na melulatsüla, telemtetba takang agitsüla aser tanur yaritsüla. Taküm nung asenoki tekangshi tem koktettsü asoshi merangtsüla” ta paisa tsüraburtem dang ashi.
Yitachu-i tawa pa China semdangi aoba indang osang tatsüka metetdaktsüdang, “China nung alirtemji ochishir, mapa meranga inyakertem aser alizüng tongteta inyaktsü temulungtetba alirtem ta ajitet aser ibaji ajanga loktiliba temerük adoker” ta ashi.
Yiatchu-i Jo Foundation ketdangsertem dang school nem grant & aid agütsütsü tanü nangzük aser paisa Jo Foundation indang website www.jofoundation.com sayatsü.
Iba website ya Ramietech Solution-i design asüba lir.
Sentong nung Jo Foundation school chairman, Daniel Thong Seb-i o jembidang ashiba agi, 2009 küm iba school lapok aser class IV tashi nung kaketshir 110 lir aser parnok rongnung teyari balaka nüngdaker 15 dena lir.