Taruba UN tanishir shimtsü atema Security Council senden amen

United Nations, October 5 (Agencies) : Bodbarnü Security Council senden nung UN nung taruba Secretary General shimtsü atema tenüng benok.
Taruba Secretary-General atema tenüng shimba maparen nung Britain, China, France, Russia aser United States-i pink ballots aser tanüngba züngsem 10-i white papers amshitsü.
UN Security Council nung veto tashi aliba züngsem pungui benokba pink sentsü ballot temji tongtipang lir aser ibaji ajanga Ban Ki-moon melenzüker shimtsü asoshi nübotem sayutsü.
Tang ya UN Secretary General menden atema candidate 10 lir aser parnok rongnung taoba Portugal prime minister Antonio Guterres mezüngbuba jenjang nung lir. Pai küm 10 shi ka UN refugee tanishir ama inyakogo.
Taoba mapang nübo shimtepba inyakyim punguben tashi agia liasü aser item ajak nung Guterres-i mezüngbuba jenjang angu, saka pa anema vote ana angu aser ibaji veto tashi aliiba linüktemi agütsü asütsü akok ta bilemer.
UN Secretary General menden atema toktepertem rongnung- taoba Serbia foreign minister Vuk Jeremic, Slovak Foreign Minister Miroslav Lajcak aser taoba Slovenia President Danilo Turk, Argentina Foreign Minister Susana Malcorra, taoba New Zealand prime minister & UN Development Program tanishir, Helen Clark nunger dena lir.
UN Secretary General shimba inyakyim nung Security Council nung shimba tenüngji General Assembly nung benoktsü. Taruba UN Secretary General-i January 1, 2017 nungi mapa tenzüktsü.
Ban Ki-moon ya Secretary-General tibuba lir aser pai January 2007 nungi iba mapa inyaktsü tenzük aser pa indang küm 10 kümsükji December 31, 2016 nü tembangtsü.
UN Secretary-General kübok civilian staff 41,000 lir aser peacekeeping operations 16 nung sepai aser police 101,000 den tema lir.
UN peacekeeping operations atema küm ka atema budget ji $10 billion shi lir.