State temi GST consultants bushir

New Delhi, October 05 (Agencies): Sangküm April ita nungi Goods and Services Tax (GST) tenzüktsü lia state temi technical tsütsü shisatsü agitsü atema tax consultants bushiba maparen tenzükogo.
April 2017 nungi GST mapatong benoktsü atema Centre-i mazüngi inyakba mapang ka nung Punjab sorkari saru inyakyim tasenba atema consultant ka shimtsü maparen tenzükogo.
Osang ajanga angazükba agi, tanga state temia GST benoktsü atema consultants bushitsü.
Punjab sorkari küm ana atema consultant ka shimtsü aser tanga state temia aji oda bushidar.
Consultant jagi GST nung department dang inyakyim nung shisatsü agütsütsü aser transition mapang atema sentong asameyangtsü.
Consultant jagisa ketdangsertem, stakeholders, industry aser shishilembartem tsüngda tongtepratep atema inyakyim asameyangtsü.
Tang state nung saru rate aser GST kübok saru rate benoka aliba nung ajemdaker GST benokba ajanga state tem koma kongshitsü, ibaji consultant-i asadangtsü.
Tang GST indang payment, returns aser refund indang draft ozüngtem renemogo aser October 20 nü tashi nung GST Council-i tax rate latettsü.