India nung asayatsü aliba Kabaddi World Cup nung Pakistan mejaok

New Delhi, October 5 (TYO) : India aser Pakistan tsüngda yimten tsütsü mangatettep adokba ajanga saisapongbaren nunga kongshir aser kiralongrartemi Uri amakba sülen cricket ketdangsertem o toktepba mapang ka nung, Hokolbar nungi tenzüktsü aliba 2016 Kabaddi World Cup nung India-i Pakistan mejaok.
International Kabaddi Federation (IKF) chairman Deoraj Chaturvedi ya India nungi lir aser pai ashiba agi, linük ana tsüngda tensa mejungi aliba atema Pakistan mejaok.
“Pakistan den inyaksemtsüba asoshi tang ya mapang tamajung ka lir. Pakistan ya IKF nung züngsem tajung ka lir saka tang tensa reprangdangra, linük ana ajungtsü mechi Pakistan mejaoktsü telemtetba agi” ta Chaturvedi-i ashi.
Külen, Pakistan-i parnok nem maongka magütsür ta aitsür. “India nung India madak takok angutsü maongka onok nem magütsü” ta parnoki metetdaktsüogo.
“Taküm May ita Kabaddi Cup nung aser taoba ita Vietnam nung Asian Beach Games nung India madak takok anguba sülen taküm 2016 Kabaddi World Cup ji parnoki takok angutsüba teimla liasü,” ta Pakistan captain Nasir Ali-i metetdaktsü.
“Onoki India nung India madak takok ngua World Cup angutsü imla liasü” ta Ali-i shisem.
Linük 12 nungi adenshia shilem agitsüba aliba Kabaddi World Cup ya Hokolbarbnü Ahmedabad nung tenzüktsü. Taküm asayamung tetenzük asayaji Iran aser United States tsüngda asayatsü.