Pakistan-i India den miim sensaksem kanür

Islamabad, October 6 (Agencies) : Pakistan aser India na miim sensaksem ka akatsüla, ta Pakistan yimyimsürtemi ashi.
Bodhbarnü Senate Committee-i lemtetba, tang nüngdakba 22 rongnung ibai ka lir aser iba ya ajanga India den tesentaktep lenmang lapoktsü, ta Brihostibarnü Dawn osang ajanga metetdaktsü.
“India aser Pakistan na tasüngda iba sensaksem ya kanga nüngdak ta angateta iba olemtep tesüiba mapang nung ama akatsüla,” ta tan Chairman Raza Rabbani lenisüba kübok lemtetba teinyaktsütem rongnung ka nung shia lir.
“India aser Pakistan na tesentaktep aser Kashmir dak sentakba mangatetteptem tajungbalen küma lemtettsü nüngdak,” ta kasa osang ajanga metetdaktsü.
Pakistan aser India naprong mulungtepa tangatettep ka nung tasü ita aser kati ka dak tamang yuteta Jammu & Kashimir tebilemtsü benteta nüburtem nem yimjung agütsütsü nüngdaker, ta yimsüsürtemi ashi.
Yimsüsür teloki international fact-finding commission ka tenteter Uri, Jammu & Kashmir nung aliba India sepai tesep amakba aser J&K nung meimchir temeden anema inyakba bushisüngdangtsü kanga süoki ia jembiogo.
Iba telok yagi Pakistan tesem balala nung, balakata Balochistan nung India nungeri amoshiba anentsüla, ta ashiba Dawn osang ajanga metetdaktsü.
Parnokisa US aser India tsüngda military tesentaktep tashi itshiba ajanga tebilemtsü ka adoker kechiba süra iba ya ajanga India tali tashi taitba akümer aser South Asia tesem nung Cold War tasen ka adoktsü, ta shisabuluba lemsatepa liasü.