LoC operation video sayatsü menüngdak: Manohar Parrikar

Agra/New Delhi, October 06 (Agencies): Brihostibarnü Union Defence Minister, Manohar Parrikar-i, Line of Control (LoC) nung army temi kiralongrartem amakba operation indang video kuli agütsütsü menüngdak, ta ashi.
“LoC operation ji noklang nung noklang tetemsü surgical strike ka lir, aser Narendra Modi’er sorkar kübok linük arrtsülen kümzüka lir,” ta paisa ashi.
Linük nübur kari Indian army surgical strikes nung junga mamangtetba dak sentakba nung Union Minister Parrikar-i, “Asen sepaitem tasü aitba nung shingaia tamang makai tarendakba maliasü, ajisüaka tang mezüng nisung kari tamang makar,” ta ashi.
CNN News18 osang ka nung, Pakistan nunger police ketdangser kati, surgical strikes ji atalokogo ta ashiba nung ajemdaker Parrikar-i, “Joko video sayatsü mesüra kuli agütsütsü menüngdak,” ta ashi.
BJP-i ayongzükba lokti senden nung jembidang Parrikar-i, “Nüngdak dang süra onoki arrtsülen raratsü ta ex-servicemen aikati melungsoa jembiogo,” ta ashi.
“Ex-servicemen aikati kü dang shidi ajanga nüngdak dang süra parnoki arrtsülen raratsü melunga lir ta shiogo. Ni parnok nem salem agütsür,” ta pai ashi.
Minister-isa linük sepaitem aser sensotem dang, tejashi nung kiralongraremi amaktsü merangtsü, kechiyong surgical strikes ajanga parnok maksüogo, ta ashi.