Wildlife Week nüngtem nung bike rally ka aka

‘Wildlife Week 2016’ nüngtem nung, October 6, 2016 nü ‘conservation Rally’ tatem küma  PCCF I. Panger Jamir-i o jembiba noksa nung angur.

Dimapur, October 6 (TYO) : October 2 nungi 8, 2016 tashi ayonga aliba, Wildlife Week sentong nung nü Department of Environment, Forest & Climate Change, Government of Nagaland aser Nagaland Motorcycle Club na lokteper October 6, 2016 nü ‘conservation Rally’ sentong ka kaa liasü. Iba rally ya Dimapur nungi tenzük aser Kohima War Cemetery nung tembanger yangji sentong tatsüka agi. Rally nung bikers parnok nisung 23-i shilem agi.
Iba rally tatem küma sentong ka agiba mapang o jembidang, PCCF I. Panger Jamir-i bike anirtem dang Dimapur nungi Kohima tashi kanga takok ngua motorcycle anir atuba atema pelaba metetdaktsü.
Pai, tzü mongpu ya shitakba melenshir, aser ibaji ajanga langka kalen nungibosa asen lipoküm nung timtem benertsür aru, ta ashi.
Wildlife week amongba ya tzü mopung den sentaktepa lir aser iba sentong ya kanga meshiteta amongtsü tim. South Africa nung tsünüsempongtsü züinba nung yarir ta nguteta aliba, Amur Falcon ozü, Nagaland-i arudang wazüka aser kümzüka ayutsüla. Asen nüburtem nem arem shiruru aser tzü mopung kümzüka ayutsü metetdaktsütsü atema media teinyaktsü tuluka lir, ta paisa ashi.
PCCF-i pelaba temaitsü Nagaland Motorcycle Club nem envelope ka agütsü.
Conservator of Forest, Santhil Kumar-i, Wildlife Week amongba nüngtem nung Dimapur nungi Kohima tashi bike anitsü sentong ya district ajak nung Department-i ayongba lir, ta ashi. Kohima aser Dimapur district nati ayongba bike rally ya yimtsüngtem nung arem shiruru wazüka ayutsü atema osang proktsü asoshi lir, ta pai shisem.
Nagaland Motorcycle Club nungi züngsem kati, ali kibur-a ta ser asenoki timba ka asen li nung asen sünütsü asür. Saka iba sentong ajanga asenok nem lipoküm aser tzü mopung wazüka ayutsü tangatetba tajung angütsür aser onoka iba sentong nung shilem agidaktsüba atema Forest Department dang kanga pelar, ta ashi.
Pai, onok club nung Kohima, Dimapur, Wokha, Mokokchung aser Mon district tem nungi nisung 80 shi lir aser onoki matamabensar aser lajartem atema rally ka August 15, 2016 nü kaogo, ta metetdaktsü.
Iba sentong District Forest Officer, Sidramappa M.C IFS-i ketdang asü aser DCF, Velatso Demo-i tepela o jembi.