Sharif-i kiralongrar anema inyakdaktsüner

Islamabad, October 06 (Agencies): ‘Pakistan linüki kiralongrartem senotsü agi yaria jenokdaktsür, anungji alimai iba linük sentoktsüla’ ta India-i tayongzükba agütsüba sülen alima linüktemi Pakistan sentokba mapang ka nung Ato kilonser, Nawaz Sharif-i ISI dang kiralongrartem anema inyaktsü tuyuba den külemi Mumbai amakba ken o akatsü aser Pathankot amakba asentenshir bushisüngdangtsü atema tuyuogo.
Bodhbarnü linük tongti ketdangsertemi Inter-Services Intelligence (ISI) tongti, Gen. Rizwan Akhtar den temaba jenjang ka nung senden amendang Sharif-i item takhangba agütsü, ta Brihostibarnü Dawn osangkaket ajanga metetdaktsü.
Sept. 18, 2016 nü Pakistan nungi kiralongrartemi Uri nung army camp ka amakba sülen India-i alima linüktem dang Pakistan sentoktsü tayongzükba agüja liasü.
India-i yimtenren tsütsü nungi Pakistan anema raraba ajanga taküm November ita Islamabad nung SAARC senden ayonga aliba linük troki thinentsüogo, iba den külemi alima nung tashi aliba linük aikati India pusema jembiogo.
Dawn osang ajanga ashiba agi, “Bodhbarnü senden nung sorkari ISI dang alima linüktemi Pakistan sentokba osang metetdaktsü aser iba tensa tamajungba makumtsü atema tongtibang onük aika nung telemtetba agia mapa inyaktsü asoshi jembiogo.”
Kasa osang ajanga, “Nawaz Sharif-i asentenshir Pathankot amakba ken o bushisüngdangtsü tuyuba den külemi Rawalpindi anti-terrorism court nung Mumbai amakba kenotem akatsü tuyuogo,” ta metetdaktsü.