JMB-i Assam nung camp amenoktsü meranger

Guwahati, October 06 (Agencies): Bangladesh nung amenoka aliba kiralongrar telok, Jamaat-ul-Mujahideen Bangladesh (JMB)-i lanurtem nem training agütsütsü atema Assam state nung training camp ka amenoktsü merangdar.
Assam police tongti ketdangser kati, Bangladesh nunger kiralongrar teloki North East nung, talisa Bangladesh den arrtsü state Assam nung amenoktsü ranglokdar, ta ashi.
“Iba teloki Lower Assam nung training camp amenoktsü meranger. Par telokisa Northeast India nung aliba telungpur telok dang nungi raraba oset alitsü meranger,” ta paisa ashi.
“Assam nung JMB itangiter 12 lir aser Assam police-i JMB telungpur aser parnok den tesentaktep alirtem jangjatsü meranger,” ta paisa shisem.
Tawa Assam police aser Kolkata police nati senteper Assam, Cachar district nung JMB züngsem, Jahidul Islam aser Barpeta district nung nisung asem puogo.
Tesüiba küm ana tsüngda Assam police-i Lower Assam nung aliba district tem nung JMB züngsem aser parnok den tesentaktep alir nisung 60 puogo aser Chirang district nung transit camp ka makdokogo.