Maytas-Gayatri (JV) teloki inyaktur aliba mapa tama atemtsüla: NCSU

Kohima, Oct. 06 (TYO): Dimapur-Kohima National Highway-29 nung four lane atutsüba mapa metenzükdang tamasa Maytas-Gayatri (JV) teloki inyaktur aliba mapatem tama renemtsüla, ta Nagaland Contractors’ & Suppliers’ Union (NCSU) teloki nenshia metetdaktsüogo.
” Maytas-Gayatri (JV) telok yagi Special Accelerated Road Development Project (SARDP) Phase-I sentong kübok lenmang atutsü mapa lemzüktsüba merenemtet lenmang aika lir, anungji item lenmangtemji tama renemtsüla,” ta paisa metetdaktsü.
Maytas-Gayatri (JV) teloki agizüka inyakba lenmangtem aika mashimashi tusar yuja lir, iba jagi nübortem tebang agi meshitetba timtem takoksa tulu ajurudagi ta NCSU-isa metetdaktsü.
Anungji, item lenmangtemji merenem tashi Maytas-Gayatri (JV) telok nem Nagaland nung tanga mapa meinyakdaktsütsüla ta NCSU teloki takangba agüja liasü saka Union Ministry of Road Transport & Highways-i kasa telok nem Dimapur-Kohima National Highway fourlane yanglutsü mapa agüja lir ta NCSU-isa mepelaba osang ka metetdaktsü.
Anungji, tang inyaktur aliba mapatemji matem tashi Nagaland nung Maytas-Gayatri (JV) teloki mapa tasen tenzüka inyaktsü memelatsü ta NCSU-isa metetdaktsüogo.
Maytas-Gayatri (JV)-i tashi mangai mapa tasen inyak tenzükra ibajibo parnok khuret asütsü ta NCSU telokisa metetdaktsü.