Mugabe-i 8 buba Zimbabwe Parliament lapoktsüogo

Harare, October 07 (Agencies): Zimbabwe Tir, Robert Mugabe-i 8 buba Zimbabwe parliament senden yashi, Brehostibar nü lapoktsüogo.
Arishi küm 92 tain Mugabe-i küm ka tejaklen parliament nung kasa onük anaben tashi azüngba sülen pa tekolok meshidaki akümer ta olulu jembitsü tenzüka liasü.
Tan parliament senden lapoktsüdang par Zimbabwe-i 2013 küm latetba linük temzüng-i melaba ama, Zimbabwe sorkari parliament nung benoka jembitsü renemba onüktem benokba den külemi, par linük indang rongsenren jenjang tajungba akümtsü onüktem Mugabe-i lemsatep.
“Shishilembartemi pei rongsen aazükba osang tejangja ochishia memetetdaktsüba ajanga sorkari saru shitak mesaruteter aser takoksa ajurur,” ta shia,  Zimbabawe’er rongsenren jenjang tajungba kümdaktsütsü nükjidong nung ali telung nungi rongsen tutetba aser raliwalitsüren den sentakba temzüng ozüng tajungba küma melenshitsü sentong renemba osanga Mugabe-i yashi sangoktsü.
Taküm 2016 küm July ita nungi tenzüka, opposition teloki Mugabe-i Zimbabwe madak küm 36 tashi yimsü asüba anemtsü tenzüka lir saka yashi Mugabe-i minute 30 shi agia onük jembidang opposition-pur kati danga ola madoki anga amen.