Bihar nung High court tetuyuba SC-i sota atar

New Delhi, October 07 (Agencies): Bihar nung Nitish Kumar’er sorkar atema osangtajung kaji- tamalen Patna high court-i state nung yi ayokba aser ajemba nokdangbaji temzüng alema ta tetuyuba ka agüja aliba Supreme Court-i sota atar.
Supreme Court bench-i, “Yi nokdangba aser temetentemji külemi moutetttsü,” ta ashi.
Patna High court tetuyuba anema October 3, 2016 nü Bihar sorkari Supreme Court nung ken o benoka liasü.
Taküm April 5 nü state sorkari state nung yi ajemba aser ayokba nokdanga liasü, ajisüaka September 30 nü Patna high court-i ibaji temzüng alema ta shia tetuyuba agütsü.
Ajisüaka high court-i tetuyuba magütsüdangyongi state sorkari October 2 nungi yi nokdangba ozüng tesashi benoktsü ta jelia metetdakja liasü.
Tamalen State Additional Advocate General, Lalit Kishore-i, Patna High Court tetuyubaji taküm April ita nungi benokba Act tejenba den sentaktepa lir. High court tetuyubaji ajanga Act tasenba nung mekongshitsü, kechiyong Act tasenba ya Bihar legislature House anapronglai agizükba den külemi state Angh, Ram Nath Kovind-ia agizükogo, ta metetdakja liasü.
High court-i tetuyuba agütsüba sülen anogo ana lir Mahatma Gandhi asoba anogomong nung Bihar sorkari yi nokdangba ozüng tasen ka benoka liasü. Ozüng tasenba kübok kidang yi rizünga lira kibong nung tain züngsemtem ajak aputsü.
Sept. 30 nü high court obendang anema Bihar sorkari Supreme Court dang, state kati yi khenyongi nokdangtsü akok asü makok, aser nisung kati yi ajemtsü atema linük Temzüng kübok temeten agüja lir asü ta asüngdanga liasü.
Bihar nung teloktep sorkari April mezüngnü nungi state nung yi yangluba, shishilembaba, ayokba aser ajemba nokdanga liasü, ajisüaka tesülenbo state nung yi tapu ajak khenyongi nokdang.