Kohima nung nisung tepsettsü meranger ka apu

Dimapur, October 7 (TYO): Nisung tepsettsü merangba aser tim mesüi kongshitsü merangba onüktem nung aija October 6, 2016 nü nisung ka apu, ta Sub-Divisional Police Officer (South) & PRO Kohima-i sangdong ka nung metetdaktsü.
Iba nisungji Wokha kübok Tsungiki yimer Pilamo Ezung’er jabaso Limhathung ta jangjaogo. Pa ya Kitsubozou colony, Kohima nung telidak lir aser North P.S nung pa anema ken o ka benokogo, ta sangdong nungsa ashi.
Limhathung-i tetsürlaji nisung maliba tesem kati aitsür ao aser tekong nung lensettsü merang. Iba mapang tetsürla ola adoka asaten aser la ola angashia kiyongertem adenshia la kümzük. Tetsürlaji lar kidangi aodang len tom nung Limhathung-i la apu, ta Kohima Police sangdong nungsa metetdaktsü.
Ano, October 7, 2016 nü Enforcement Officers aser COPTA Kohima nungi Flying Squad ketdangsertemi South Police Station telongtet nung aliba rejutem anasa dokantem mita ao. Iba mapang dokan kibur 33 tashi apu aser parnoki moko ayokba atema senchi achiba nung sen 6,600 tashi sarutet, ta Kohima Police sangdong nungsa metetdaktsü.
COPTA Kohima nungi ketdangsertemji Police aser Health & Family Welfare Department nung dena liasü aser parnok apuba moktemji CJM Kohima ket nung agütsüogo, ta sangdong nungsa ashi.