DMHSS-i Rongsenkaba mang ayimer

Dimapur, Oct.07 (TYO) : Tesayur aser Tsüngremer mapa nung temulung agüja inyaksang, tebu tedi Wb. Rongsenkaba, Dimapur nung par kidang lia October 6 nü alima nungi pilaa aoba osang angashia Dimapur Mission Higher Secondary School nung (DMHSS) Governing Board, Principal, tesayur aser kaketshirtem ajaki jashi mang ayimer ta sangdong ka nung metetdaktsüogo.
“Asür Rongsenkaba ya 1996 küm nungi 1999 küm tashi Dimapur Mission School nung ya Administrator liasü. Pa mapang nung school asoshi mapa tajung aika inyaka toktsüba onoki meteta lir. Pa asüba ya asenok rongnung bendanga agütsüba tesayur aser ketdangser tajung ka samar asütsü. Pa tesem balala nung tesayur mapa inyakba mapang nisung aika tajung kümtsüogo,” ta DMHSS tenüng nung Governing Board nung mendenbuba Wb.K.Temjen Jamiri metetdaktsü.
Paisa asür kinungertem nem Tsüngremi tesünep agüjang ta sarasadema metetdaktsü.
Asür Rongsenkaba den asüpila sentep sentong Hokolbar anepdang Dimapur nung par kidang nisung aika adenshia temenungratsüka lir külen pa mang Naga Cemetery nung rema toktsüogo.