Nagaland ya shisaliok angazükdak tiyongtsü kümtet: F P Solo

Kohima, October 07 (TYO): Tanü Capital Convention Centre, Kohima nung Fountain Club Kohima den SCERT Nagaland-i yarisema ayongzüka 5buba Nagaland Spelling Bee Championship “The learning edge” omen nung tenzükogo.
Tan tetoktepba nung Kohima, Dimapur aser Peren nungi shisaliok reju 37 nung shilem agir ajak agi parnok 63 lir, aser parnok rongnung tetsür 29 tebur 34 lir.
Tanep iba sentong nung jembidang School Education & SCERT Commissioner & Secretary, F P Solo-i, kidanger state tem aser kidanger linüktem atema Nagaland ya shisaliok angazükdak tiyongtsü ka kümtettsü, kechiyong English oshi nung tamendakdak tashi itta lir, ta metetdaktsü.
Paisa, state nung English oshi tamendakdak tashi itta yanglua lir, anungji asenoki asen tashi nung ibaji yangertsüla ta ashi.
Ajisüaka tesasaba olen ka nung pai, Naga nungeri asenok science aser maths subjects nung tashi maitba atema süoki ia bilemer, aser ibaji ajanga asenok English nung tashi itta aliba nungi maongka agitsü makoker, ta ashi.
“Kidangser state tem atema dang masü saka Thailand, Myanmar aser China linüktem atemaa Nagaland state ya shisaliok angazükdak tiyongtsü ka kümtettsü,” ta paisa ashi.
Fountain Club-i iba championship ayonga akaba atema tenüngsang agüja Solo-i, spelling bee, o toktepba aser tanga shisaliok tetoktepba balala ajungshitsüla, iba den külemi school tem nung phonetics, spoken & functional English ji talila subjects ama tenzüktsüla, ta ashi.
Ano külen Solo-i School Education Department nung tashimaittem lir saka tajungba akümtsü atema meranga inyakdar, ta metetdaktsü.
SCERT Director, Khrietuo Mezhür-ia, joko nisungtem IT lima ka nung alir asünungji spellings aser vowels atema mebilemer, kechiyong SMS aser chats nung vowels peria mamshir aser olongtema ojang agi mabensai amshir, ta ashi.
Organising Committee Convenor, Vilekho Bio-i lokti dang, tang tashi nungbo iba tetoktepba nung class 8 nungi 12 kaketshirtemi shilem agir, ajisüaka sangküm nungibo Class 7 nungi 10 kaketshirtem dang asütsü, ta metetdaktsü.
Iba tetoktepba ya asüng, Honibar nikongdang St. Francis De Sales Church Kohima Parish Priest, Rev. Fr. Alex Vizo-i sarasadema tembangtsü.
Tanü iba mezüng toktepba sülen nisung 63 nungi 32 shimogo.