Dimapur nung Mayangnokcha award agütsüba sentong agi

Mayangnokcha Award 2016 agütsüba sentong nung tongti tejaoker, Parliamentary Secy., Wb.Eshak Konyak den Award agizükertem aser MAT purtem noksa nung angur. Dimapur, Oct.07, 2016.

Dimapur, Oct. 07 (TYO) : Nagaland Board of School Education kübok aliba school-tem nungi Nagaland nung aliba Naga nunger kaketshirtem rongnung 2016 küm class 10 nung takok angurtem rongnung tematiba takok jenjang angurtem nem agütsüba Mayangnokcha Awards tanü agütsüogo.
Iba awards agütsüba sentong ya Dimapur Mission Higher Secondary School-i anepalua Dimapur Ao Baptist Arogo kübok Town Fellowship tenla kidang agia liasü. Iba award ya 1994 küm nungi tenzüka Mayangnokcha Award Trust teloki agütsür aser taküm agütsüba awards ya 23 buba liasü.
Taküm 2016 küm iba Mayangnokcha Award angutsüsa Class 10 nung takok angurtem ajak rongnung tematiba takok jenjang (topper) angurji Edith Douglas Higher Secondary School, Mokokchung nungi kongru Phepon P Meya liasü. La nem nüngo aser kuli kaket ka den sen Rs.25,000/0 agütsü. La denji ano subject shia tematiba takok jenjang angur par pongo nem agüja liasü. Itemji English subject nung tematiba takok jenjang angur St.John School Diphupar ‘B’ nungi P.Tanghiu Khiamniungan nem MAT-NE Sun Award agütsü, Ao aser Social Science subject nung tematiba takok jenjang angur Edith Douglas Hr Secondary School nungi Alemzüngba Jamir nem MAT-Rockdale Award aser MAT-YRSD Award agütsü, Science subject nung tematiba takok angur Christian Higher Secondary School, Dimapur nungi Tongpangtangla nem MAT- Tir Yimyim Award agütsü aser Mathematics subject nung tematiba takok jenjang angur Little Flower Hr.Sec. School , Kohima nungi Nüsavolu Nyekha nem MAT-EFoM Award agütsü.
Tanü item award agütsüba sentong nung tongti tejaoker, Parliamentary Secretary, Wb.E.Eshak Konyak-i takok tajung angurtem nem tenüngsang agüja jembidang, tanü putu nung kaketshirtemi pei sobaliba meteta alitsü aser nübortem tenzükba mapa nung temulung agüja inyaktsü asoshi tangatetba alitsü nüngdaker ta metetdaktsü.
“Tanü Nagaland nung sorkar tenzükertemi kecha agia temulung masür, iba jagi pei mapa inyakdak malir aser angati ita sen chia kazütsü atema government mapai aier. Ajisüaka, mapai mao anguba aser ochimashiba sen agi pei tanurtem mesübaji atakatem angutsü,” ta Parliamentary Secretary, Eshak-isa metetdaktsü.
Tanü iba sentong nungsa 2003 küm kasa award angusang aser tang Nagaland PWD (R&B) nung engineer Wb.Seyiekhrietuo Solo-i mapang tatsüka agia jembidang, ‘asenok kaketshirtemi kechisarina metetnüa asüngdangtsüla aser idangji ya kechiba (?) ta dang masü saka ya kodaser makoktsü (?) ta asüngdanga pei dak aketba sempet aser tashi amshia pei ket agi mapa inyaktsüla,” ta kaketshirtem ayongzüka metetdaktsü. Paisa mapa ajak nung Tsüngrem dang asüngdanga inyaktsü ajungshi.
Iba sentong tetenzüklen MAT tenüng nung Wb.Er. Moa Aieri jembidang, Nagaland nung tenüng agidang kaketshisatsü agütsüba tensa tia ya melentsü asoshi shitak shisaliok agütsüba tetezü aser nükjidong angateta state government-i memenui inyaktsü imlar ta metetdaktsü.
Iba sentong nung Discipleship Bible College, Dimapur nungi Challengers teloki MAT naklo ken aten aser DMHSS nungi kaketshir Keviholia ken tajung ka tena liasü. Iba sentong DMHSS nung Chaplain, Wt.Merensolai ani aser Nagaland Mission Movement nung Director, Rev.Andrew Semp-i sentong tenzüka sarasademtsü.
Iba sentong nung shilem agirtem ajak dang pelaba o DMHSS Governing Board nung mendenbuba Wb.K.Temjen Jamiri metetdaktsü aser NCRC Purana Bazar nung Senior pastor, Rev.Dr.Shiwato Assumi sentong tembanga sarasadem.
Iba sentong nungsa tanü MAT Award agizükertem awabanger Tsüngrem tenzükertemi sarasademtsü.