Aoer Impur lima azüngmeyaka akümer

~ I. Meren Lemtur, Tzüdikong.

Topur tajung meraket Impur lima, Naga limai mezüng Yisu Khrista yimsü agizüka amanga aruba kinji asen Ao kin ya lir. Mezüng asen tsürabur Oboula, Otsüla nungertemi iba Yisu yimsü tajung ya agizüka amanga tzüa meseni tongmelang tamang agi ochishia amanga aru. Tsüngremer temoatsü tulu asen Ao kin rongnung amenoker iba tesangwa Naga kin ajak leni ayimsünga aotsü asen Ao kin dak mangdang tulu ngua, tzüyimsa tzüyim ajanga aruagi Tsüngrem tenzükertemi mulung lemteta Impur lima ya mesemteta Mission centre ta jateter tanü tashi asen Naga kin asoshi Tsüngremer khunen tong sür artudagi.
Akhi ken mapang ka nungbo shiranga alirtema Impur ta danga tetshi nunga shiranga alirtema temolung süngzüka liasü. Ano taküm nung Impur lima mengudangi asütsüa na ta sasaa bilembaa liasü. Tesüiba mapang anogotem tu kotang bilemdangdir, mongdang mongji balala,ano arogotem nung deptt- balala nung tenzükertem asoshi training balala agitsü asoshi Impur lima adenshia anogo ana asem tashi Impur lima temeshi yimti nung adenshia amungdang, oda Kodak lima nung amunger ama Tsüngrem sentsüwanghidakja arogo balala pei tanendak kiyong ajak nung sarasatemba  aser ken adenba ola agi sünger longsolongben Tsüngrem külemba nanüng tulu agi Impur lima yamoka liasü. Mongdang aser training balala nung tesayur  alima tesem balala nungi jaoker Tsüngrem O teyungtsü sür tesayuba tajung agüja kangasa temoatsü ngua asentenshi tulu nung Impur lima metoktsünüseti menungraseta toktsür pei arogoi senshi dang, oda Kodak nungi alima dangi alur amasa bilema senshia liasü.
Taru tao nung arogo shia gari balala nung menteper revival ken atenba ola agi arem  meta lendi ajak yamoka Tsüngrem sentsüwangshidakja aru. Saka tangbo asen Aoertem asoshi Kotak mesüka aliba Impur lima koda azüngmeyaka lir. Joko arogo lokti balala nung tenzükertem asoshi training  balala Impur lima adenshia Tsüngrem o nung ajemdaker tenzüker ka koma khuret angateta tenzüktsü ta tesayuba tu melena tenzüker tulu nungi tilatiba oda arogo nung child deptt-tashi bendang lima, Delhi, Kolkata ano India lima tesem balala nungang oa mungteper shilanger aser item lima topur ajung standard koba tashi aoer, item dakji teimba ka rangloker shitak mesük ama saka asen sobaliba tamangba den tera mapet, item tangazükba aser tesayuba agi Ao arogotem tanemtanemi tanga lenmang kati ayaoka jajatsü tenzüker masüa ma! Akhi anogotem nung ABAM nung tenzükertem küm piyong  nung arogotem sema Tsüngrem o shia ajungshia sayutsüngiba liasü.
Impur nungi tenzüker arogoi arutsü osang angashidang, Impur nungi arua ta asübaji kanga akümketa liasü. Saka tanübo iba osang tajung sangtongba to melena, arogo nung shiba tekolak asütsü, mongdang aser arogo nung rongsen koma teimba ajangzüka amshitsü, ABAM nung tenzükertemi anir Town arogo nung Rev aser Pastortem tzükong, tzükong lemsaer arogo nung senpong ka dang asütsü, aser ajak madak Pastor tekolak asütsü ta mazüngi tesayuba dang agüja jajateptar ji! Asen Aoertem, ano kopi melii asen Ao arogotem nungbo joko tenla ki nung pulpit nung Pastor-i mesüra sayusüngirtem nokdaker Tsüngrem O nungi sayusüngiba yabo joko asen Aoer tamangba standard denbo mapet ojang dang südi, oda Laishiba nungi nisung kar otsü dang agiteta Film dang kar yanglur sentep mapang nung reprangbajiang nisungtema teyimba sentepi arutsü, anungji Tsüngrem O melena film-ang repranga külemdi ta Impur nung asen Aoertemi ano shitak mesükba tamangba yimsü ka yakta asatettsü kanga tsüina bilemer.
Küm anabuba Ao arogo Omen: “Tsüngrem O dangi meyipdi” tabo ayu, saka asenok mapa agibo Tsüngrem O dangi masü, saka alima rongsen koda tuluba renloka aotsü, iba dangi dang meyiber amai. Impur nung kimong (tawa)tila kata melii Ao arogotem Guest housebo ozü arogosa tajungba asütsü ta rongsen jenti endoka toktepa kibo yanglua ayu, saka joko mongdang mongji alitsüa anogo kwi amongtsü ta masü, saka ghonda tasazük dang asazüka yur, town tulu arogotemi kechi teinyaktsü onük renema bener arur, idakji yimtsüng arogotemi shidangtsü kecha meshidangteter, joko anidaknüyonga, manidaknüyonga town arogotemi aniba tsüngsü teimba ka nung asen Ao arogotem odagi.
Temeim asen Aoertem, tanü asen tia ya ken meyipa shisadangtsü mapang ka agi tongogo. Tsüngremi Aoer Impur dang mepelaba kar ali asü na! Asen Aoer-i Impur lima azüngmeyaka toktsüba, asen Aoertemi Tsüngrem sentsüwanshi melena alima sentsü agi Impur lima melenba agi Pai asen Aoer dang nungi Pa tejak meyiber asü, Oh! kü temeshi yimti Impur, aki mapang nung na  sentsüwanghia aliba lima, tanübo na koda azüngmeyaka akümer, Kotak lima den saku aliba sentsüwangshi tu kechi agi rema kümdaktsür, Akhi ozü Aoer tamang mongjen Impur lima ama tu ano ozü Aoertemi yanglutetlasang, Teyanglur Tsüngremi ozü Aoer dang Pai mesemtetba Impur dang temolung chia, ” Ni  Impur  lima  dang  kangasa  pelara ta  shila sang  na!”