Durga Puja ajanga tetsür jenjang tajungba akümtsü imlar : Mukherjee

New Delhi, October 9 (Agencies) : Tir Pranab Mukherjee-i Durga Puja tenüng nung India senso ajak dangi tepela salem osang lemsatepdang, iba benjung ajanga linük yangerba mapa nung tetsürtemia kasa shilem agitsü ajungmesotsü imlar ta teimla aliba osang metetdaktsü.
“Durga Puja benjung nung ni linük nung aser bendanglen aliba külem sensosanger ajak dangi salem abener” ta pai ashi.
“Iba benjung ajanga linük nung asentenshi aser meyipshishi adokdakjang ta moatsür. Iba benjung ajanga linük yangerba mapa nung tetsürtema shilem kasa lir ta asen loktiliba nung tangatetba adokdaktsütsü ajungmesor. Goddess Durga ajanga asenok tim lenmang nung anitsü aser linük tenzükba nung moatsütsü sarasademer” ta Mukherjee-isa shisem.
“Temenen madak takok anguba tamaitsü nung Durga Puja amunger. Goddess Durga ya alima ajunga tetsü lir aser la dak yimya tajung ajak lir” ta Tir-isa metetdaktsü.