BJP-i India nung Pakistani artistes dang kiralongraba aitsütsü sangoktsür

New Delhi, October 9 (Agencies) : Indian industry nung shilem agir Pakistani artistes dang Bharatiya Janata Party (BJP)-i tekümdangtsü olen ka metetdaktsüogo.
BJP-i parnok dang kiralongrartemi amakdang aitsütsü aser parnok linük nung kiralongraba maparen bulua inyakba anema ola adoktsü tayongzükba agütsü.
Pakistani artist temi kiralongraba aitsüra, ibaji parnok linük atema tajung asütsü aser ibaji ajanga Pakistan nunga kiralongraba maginürtem lir ta alima dang sayutsü, ta BJP otongdar Siddharth Nath Singh-i Deobarnü metetdaktsü.
“Indian film fraternity nung shilem tuluba kati India nung arua shilem agir aser sen aazüker Pakistani artist temi kiralongraba aitsütsüla ta bilemer. Anungji, nenoki kiralongraba atema tangatetba ana malitsüla. Nenoki Paris amakbabo aitsütsü saka Uri nung atalokbabo maitsütsü aser süoki ia mebilemtsü ta masütsüla” ta Siddharth-isa ashi.
Pakistan nunger actor Fawad Khan-i alima nung yimjung alitsü atema longjemtsüla ta olen jembiba aser actor Mahira Khan-ia Honibarnü yimjung alitsü atema mepishia metetdaktsüba sülen tanü BJP-i iba osang metetdaktsü.
Ajisüaka, nisung kari actor anaprongla Uri amakba atema aitsür aser tena anemertemi tena dang tangatetba melenshiang ta takhangba agütsür.
Ano külen, Indian actor Ajay Devgn-ia tang tensa nung pai Pakistan nunger actor shinga dena külemi shilem magitsü ta metetdaktsüogo aser director Farah Khan-ia la indang film nung India nunger actor nem dang shilem agidaktsütsü ta shiogo.