MDSC-i Dec nungji Auto Cross aser Adventure Trip ayongtsü sentong renemer

Hotel Metsuben nung osangbener senden ka kar külen MDSC ketdangsertem noksa nung angur.

Mokokchung, Oct 9 (TYO): Nagaland nung motor rally mezüngbubaji Mokokchung nung tenzük aser ibaji Nagaland Autumn Rally ta sür 1991 küm October 10 & 11 anogotem nung ayongzüka liasü, ta Deobarnü yangi Hotel Metsüben Mokokchung nung Mokokchung District Sports Council (MDSC) ketdangsürtemi osangbener senden ka alidang metetdaktsü.
Mokokchung nung Nagaland Autumn Rally tenzüker taküm 2016 nung küm 25 ajunger, iba nüngtem nung December 14 & 15, 2016 anogotem nung Mokokchung nung Auto Cross aser Adventure Trip sentong ayongtsü aser iba nungji tedener ajak adentsü akok, ta MDSC tatong tir Wb. Alemtemsü Lkri metetdaktsü.
Paisa autumn rally indang kar ashidang, Nagaland nung rally mezüngbubaji MDSC-i 1991 nung ayongba 1st Nagaland Autumn Rally liasü aser iba rally-ji Kohima-Kiphire-Tuensang-Mokokchung (halt)-Chozuba-Kohima-Mokokchung ta jajar külen tembanga liasü.
Tanabuba Autumn Rally-ji 1992 nung Nagaland Statehood ngur küm 35 ajungba benjong den külemi agia liasü, ta paisa ashi.
Iba den ano, MDSC-isa Discover Mokokchung ta sür 2006 küm ayongzüka liogo, 2008 küm Tour De Hills 1, 2009 küm Tour De Hills 2 aser 2015 küm Mokokchung Town küm 125 ajungba tenüng nung Tour De Hills 3 motor rally sentong ayongzüka liasü, ta paisa shisem.
MDSC ya 16th Feb, 1979 nü tenzük. Nagaland nung sports council mezüngbubaji MDSC lir aser tesülen tanga district nunga sports council balala tenzüka ao, ta MDSC ketdangserisa ashi. Tang tashi nung MDSC kübok züngoka aliba association-ji 20 jungnüa lir saka kanga junga aobajibo 11 shi dang lir, ta ashi.
Alembaisa MDSC mangdang kar lemsatepdang, sangküm nungi Inter School Sports Festival tanaben asentenshia tenzükshitsü, sangküm Moatsü benjong mapang sports tourism ajungkettsü asoshi motor rally ka ayongtsü aser tarutsü nung sports village ka mesemtsü tebilemba lir, ta ashi.
Iba Auto Cross aser Adventure Trip dak sentakba nung osang tejangjajibo mapangtong nung osangkaket balala ajanga metetdaktsütsü, ta MDSC ketdangsertemi ashi.
MDSC ya Mokokchung district nung saisapong tentet tsütsü tekolakba lir. MDSC nung medenbubaji Mokokchung Deputy Commissioner shiba arudir pa/la ji akümer aser tezülurjia District Sports Officer (Mokokchung) shiba lidir pa/laji asür. Tanüngba züngsemtemji Mokokchung nung telidak pur shimer.