‘Onok nem injang aser grenade melena pen aser kakettem kua’ : ENSA

Dimapur, October 9 (Agencies) : Eastern Naga Students’ Association (ENSA)-i India aser Myanmar sorkartem dang parnok nem injang aser grenade masü, pen aser kakettem ang agüjang ta metetdaktsü.
“AK-47 injang aser hand grenade tem agütsütsü melena, linük anaprong nungi sorkartemi onok nem pen aser kakettem ang agütsütsüla” ta ENSA President, Reego Shonshei-i yashi osangbener dang ashi.
Shonshei ya Myanmar nung Naga Self-Administered Zone nungi lir aser pai ashiba agi, iba tesem nung alirtem kanga sensak tia nung alir.
“Onok alidak gari lenmang mali, medical centre mali aser nisungtem ayatzüra agi asür. Tawa tu iba tesem nung measles wara adok aser nisungtem aika süogo. Aji dang masü saka tanga tashidaktem ajanga nisungtem taküm samar” ta paisa ashi.
“Onok aliba tesem nungsa school kar lapoka lir saka itemji tesayur kati dang acha-ayanger. Ajisüaka, Naga nunger tanurtemi school-i moner, kechiyong parnok dang Burmese oshi agi dang sayur” ta Shonshei-isa metetdaktsü.
2000 küm nungang iba tesem nung alirtemi ‘Burma’ lir ta meteta aru, kechiyong iba kümji Myanmar sepaitemi iba tesem nung jenoka aliba telungpur teloktem anema mapa inyak, ta paisa shisem.
Kasa osangbener senden nungsa International Border Area Peoples Welfare Organization (IBAPWO) nungi lennirtemi Indo-Myanmar anasa aliba tesemtem nung terenlok mapa inyaktsü atema state policy balaka yanglutsüla ta tebilemba metetaktsü.
Myanmar den arrtsüa aliba district pezü- Mon, Tuensang, Kiphire aser Phek nung border belts 7 lir aser item tesemtem yagi tangar memenepi lir. Tesüiba küm 70 tashi onoki khuret aika ajurua arur, ta IBAPWO general secretary, Mokshom-i ashi.