Naga nunger longjemtsü kanga saaka kümogo : Dr.Imtiwapang

Honibarnü Yisemyong Adhoc Town Committee hon jubilee nüngshilung sayaba sülen Parliamentary Secretary, Dr Imtiwapang Aier (abelen nungi pezübuba) den tangartem agiba noksa angur.

Mkg. Oct.09 (TYO) : Tanübo Naga nunger longjemtsüba ya kanga saaka kümogo kechiyong Naga nungertemi pei ajungtsü asoshi dang bilemer ta Parliamentary Secretary, Dr.Imtiwapang Aier-i metetdaktsü.
Pai iba o ya yashi Yisemyong nung Yisemyong Adhoc Town Committee tenzüker küm 50 ajungba Jubilee mong sentong nung tongti tesemdanger o jembidang metetdaktsü.
Naga nunger yimten nüchiso asoshi tenzükba telok tanübo telok aika küma lemsaogo aser asenok rongnunga shingaia shinga dak temulung melemteti kümogo, iba jagi asenok yimjung nung malir aser terenlok mapa meinyaktetter ta paisa ashi.
Paisa Nagaland nung election timi merüka agitsü asoshi nübortem tangatetba tajung kati arutsüla, kechiyong nübortemi mangatet tashi election timi agitsü sentong ayongzükba mapatem ajak amajok akümtsü ta metetdaktsü.
Nagaland nung ochishir aser tetemsü yimsüsür nüngdakba indang ajaki jembir, ajisüaka asenok memelenshi tashi aser asenoksasa asenok tashimait mereprangi tangar dang aija jembi tashi temelenshi tajung ka asenoki mengutettsü ta paisa metetdaktsü.
Asenoki jungjunga bilemdangra, tanü asen lima nung ochimashiba indang jembiba ya yimtak yimtsüng aser nübortem dak nungi tenzüker, anungji tangar maitsü dang asenok tama melenshidi ta Dr.Imtiwapangisa metetdaktsü.
Paisa school nung tesayurtem dang pei melen tangar meyoki ochishia aser nendaka tanurtem dang sayutsü ayongzük.
Joko, Nagaland nung government mapa angutsü kanga saaka kümer asünungji government mapa bushitsü melena tanga mapatem bushitsü asoshi shisadangtsüla aser peisasa mapa ka mesüra ka tenzüka inyaktsü ajungshiteptsü nüngdaker ta paisa metetdaktsü.
Iba Jubilee sentong nung tongti o jembirji PHED nung SDO Er.Masachuba Ozüküm liasü aser Süngratsü o Mongsenyimti yimten na nungia tepela tajungshi o jembia liasü.