India Ato Kilonser kaji teti duty nung alir:PMO

New Delhi, October 11 (Agencies) : India nung Ato Kilonser kaji teti duty nung alir, tesüiba mapatem nunga Ato Kilonsertem sodi agiba record mali, ta Prime Minister’s Office (PMO)-i ashi.
Iba o ya Cabinet Secretariat aser PMO dangi nisung kati Right to Information (RTI) application ka yoka linük Ato Kilonser sodi agiyim indang copy ka meshiba mapang ashi.
“Ato Kilonser kaji teti duty nung lir ta shitettsü,” ta RTI-i PMO nungi langzü.
Iba kasa nisung jagi tesüiba mapang Ato Kilonsertem Manmohan Singh, Atal Bihari Vajpayee, H D Deve Gowda, I K Gujral, P V Narasimha Rao, Chandrashekhar, V P Singh aser Rajiv Gandhi nungeri sodi agia lir maliar metetnüa asüngdangdang, “Tesüiba mapang Ato Kilonsertemi sodi agiba mesüra magiba osang iba office-i bendena mayur. Ajisüaka tang aliba Ato Kilonser Narendra Modi-i pa iba menden nung amentsü tenzükba mapang nungi tang tashi nung sodi khen danga agia mali,” ta RTI-i langzü.
Iba nisung yagi Cabinet Secretariat dangia tesüiba mapang Ato Kilonsertem sodi agiba osang aser iba dak sendakba nung inyakyim koma lateta lir ta asüngdanga RTI application ka yok.
Ajisüaka telangzüba kecha magütsüi iba shidiji home ministry dangi yok aser parnoki PMO dangi yoka yang nung jagi tesüiba mapang Ato Kilonsertem sodi agiba osang kecha mali, ta metetdaktsü.