Town Unit-temi Ao Senden telemtetba nungiter; NSCN-IM Ao Region mapa aitsür

Dimapur, October 11: Nagaland government-i Nagaland nung Rongmei nungertem nem ‘Indigenous Naga Tribe’ jenjang agütsüba telemtetba anema Ao Sendeni September 23, 2016 nü kechi lemteta lir, iba nungji masetshii tatem tashi nokdaktsü ta tanü Mongolbar nü Ao Senden kübok aliba town unit ti külem sangdong ka ajanga metetdaktsüogo.
Iba telemtetba ken o ya Mongolbar nü Dimapur nung Ao Senden kübok züngsema aliba town unit Kohima, Mokokchung town, Dimapur, Mon, Tuensang, Wokha, Chumukedima aser Medziphema nungi Ao Senso Telongjemtem nung lenirtem adenshia lemtet.
Nagaland government-i Rongmei nungertem nem ‘Indigenous Naga Tribe’ agütsüba ajanga Nagaland nung alir Naga nunger lanurtem akoksatsü alinungji, ibaji agientsüla aser ano Naga Hoho-ia state government nem Rongmei nunger nem state government-i mulungba ama kasa jenjang agütsütsüla ta tamalen agüja aliba ken o ji meyipa agitsüla ta Ao, Sumi aser Lotha kin telongjemi takangba agütsü saka parnoki aginüba ama meinyaktsüba agi Central Naga Tribes Council nung dena aliba kin asem Ao, Sumi aser Lotha nungertem Naga Hoho nungi atsüngina atatsü lemtet.
Ajisüaka, iba dak sendakba ken o nung Ao kin rongnungisa kari Ao Senden telemtetba anema nokdakba agi, iba ama tatalokba maparenji jembitsü atema tanü Mongolbar nü Ao Senden kübok aliba town Federal unit-tem Dimapur nung adenshia jembiogo ta parnokisa ashi.
Iba senden aliba sülen parnok lenirtemi osangbenertem den jembidang ashiba agi, parnoki Ao Senden Federal Asseembly 23rd September, 2016 anogo nung Ao Senden Naga Hoho nungi atsüngina alitsü lemtetba telemtetba nung tatem tashi masetshii nokdaktsü lemtetogo.
Ano, item Ao Senden kübok aliba town unit-temisa Ao Senden Federal Assembly 23rd September, 2016 anogo nung lemtetba anema NSCN-IM Ao Region nungi Aor linük tenzükertemi inyakba mapaji aitsür aser Ao Senden telemtetba anema maotsüla aser meinyaktsüla ta parnokisa ajangajanga metetdaktsü.