12 buba Inter District & State TT C’ship tenzükogo

Kohima, October 11 (TYO): Kohima kübok Indoor Table Tennis (TT) Stadium nung sentong tajung ka agia, 12 buba Inter District & State Table Tennis Championship 2016 tanü, Mongolbar nü tenzükogo.
Nagaland Table Tennis Association (NTTA)-i ayonger külen Kohima District Table Tennis Association (KDTTA)-i ketdangsüa anogo 3 agia asayatsü renemba asayamong nung Dimapur, Kohima aser Mokokchung nungi asayar noklang ka shi takok marok agizüktsü asoshi kanga meranga asayatsü tenzüka lir.
Tan asayamong nung champion jenjang angur nem sen 10,000 aser tanabuba jenjang angur nem sen 5000 senpet agütsüba den külemi, individual shilem nung tebur, tetsür, lanur aser junior tetoktepba nung temaba aser tanabuba jenjang angur nem sen 5000 aser sen 3000 senpet agütsütsü renema lir.
“TT asaya ya nisung anisüngzükdaktsüba asaya aser tanga asaya mesüki senotsü kanga dang ajema nungdakba asaya tajung ka lir,” ta asayamong tenzükba sentong nung tongti tesemdanger, Secretary, land Resources Department, Y Kikheto Sema (IAS)-i metetdaktsü.
“Tanü tashi nung Nagaland state-i asür, Dr. Tali Ao aser Chekrovolu Swuro na densema, Olympic jenjang nung asayar 2 tashi dang anitetba atema sasar,” ta shia, saisapongtsü aser asayartem den sentakba temetettsü tesayuba school tesayuba nung inoksemtsü nungdakba olen ka Kikheto-i lemsatep.
“Tawa tembanga asayaba Rio Olympics nung kidangsüa aliba Manipur nungi asayar aikati takok ngua shilem agiogo,” ta shia, asoajen aser asayatsü sempet nung tangar menepa alir, Nagaland nungi asayartemi kidangsüa alir asayartem nungi tansütsü tajung agir saisapongtsü sabang nung tali temulung agütsütsü tayongzükba olen ka tongti tesemdanger-isa metetdaktsü.
Tanü tetoktepba tenzükba jakdang Chief Umpire, Dr Asalie Khezie-i ketdangsüa, asayartem nem asayatsü tenangzükba agidakja liasü.