MDMAA Jubilee-mong takok ngua mongogo

Tongti tesemdanger, Alemtemshi Jamir IAS (retired)-i MDMAA jubilee nüngo kaket sayatsür külen MDMAA ketdangsertem den aroki agiba noksa ka yangi angur. (Mokokchung, October 11)

Mokokchung, October 11 (TYO): Mokokchung District Martial Art Association (MDMAA) tenzüker küm 25 ajungba jubilee-mong sentong den repsema, mixed martial arts tournament ka tan October ita 10 & 11 nü tashi Mokokchung kübok Imkongmeren Sports Complex nung tentetba Multi Purpose Hall nung takok ngua agiogo.
“Martial arts ya saisapong tajung rongnung ka lir aser martial arts asayaba ajanga nisung ka taküm nung anema lidaktsüba den tekolok, shisatsü aser mulungsentsü arakzüka temang tali tashi ita yutsür,” ta October ita 10 nü agiba jubilee-mong sentong nung tongti tesemdanger, taoba Nagaland Chief Secretary, Alemtemshi Jamir IAS (Rtd)-i metetdaktsü.
“Saisapongtsü ya maongka tajung anguba dang masü saka konang aser rongsen tajangzük anguba sabang ka lir. India’er tetsür badminton asayar, PV Sindhu-i tawa Rio Olympics nung takok tulu anguba sülen India ajungai la tesüngmangtsüka tushiba den, la nem ronsen jenti tenlaba ajanga la takar nisung ka kümogo. Saisapongba nung maongka jenti lir, anungji, lanurtemi süoki ia agiba den tsüraburtemia lanurtem ajungshitsüla,” ta pai ayongzüka ashi.
“Alima ajunga nung ajaki kasa maongka angur saka taküm liyonga aotsü aser takoker kaka akümtsü asoshi tajungtiba asütsü nungdaker,” ta shia, tarutsü mangdang tajung yur inyaktsü tajungshiba olen ka paisa lemsatep.
Tongti tesemdangeri MDMAA jubilee nüngtem nung adokba nüngo kaket sayatsüba den mixed martial arts asayamong tenzükja liasü.
Ano külen, MDMAA mezüng tenzüker rong nung Sashi Ao-i mapang tatsüka agia, taoba mapang tatalokba balala ajangshiba indang menungra bilema olen ka lemsatepa liasü.
Anogo ana tashi agia jubilee-mong amongba den martial arts tetoktepba nung asayar aikati pei sempet tajung sayuba den tetoktepba balala nung kanga junga shilem agi aser takoker nem senpet, kulikaket aser medal agütsü.
Tan asayamong tetendanger rong nung Dr. Senliwati Longkumer (Mansuria Kung-fu 5th DAN, Bryagarh Karate 4th DAN, Shitu Ryu 4th DAN) aser Rajen Yumancha (New Kung-fu black belt 5th DAN, Kick Boxing black belt, Chinese ninja black belt, Indian Kung-fu Federation Teacher) na tongtipangsüa densema liasü.
Tetenzükba sentong nung Mokokchung Deputy Commissioner, Sushil Kumar Patel IAS aser District Sports Officer, K.Libema Jami natia o tatsütsü jembi.
Tatem sentong nung Nagaland Parliamentary Secretary, Veterinary & Animal Husbandry, S. Chuba Lkr tongti tesemdanger asütsü asoshi jaoka liasü saka pa koda masüba maparen kar ajuruba ajanga marutet nung, pai par Personal Secretary, Aokümba yoka sentong takokba nung tembangtsü.