MDFA 2016: OCYU, SSS & DYA quarter final-i iogo; Hills o Socianian na asaya tom nung anen

Youth Association Marepkong telok den asayaba 3 buba MDFA 2016 pre-quarterfinal asaya nung Dilong Youth Association asayar ka yirur aliba noksa nung angur. (Mokokchung, October 12)

Mokokchung, October 12 (TYO): OCYU, SSS aser Dilong Youth Association (DYA) teloktemi 3 buba prequaterfinal asaya koka, tang tasayadak MDFA 2016 football asayamong quarterfinal asayatsü jenjang tanü, Bodbar nü ajangzükogo.
Ajisüaka, tsüngsang majungba yong Hills XI F/C aser Socianian F/C telok na tsüngda asaya tom nung anentsüsa aküm.
DYA teloki goal 2-1 agi Youth Assocition Marepkong telok madak takok ngua, quarterfinal asayatsü jenjang ajangzük.
Inshalu-i asaya tenzüker minute 27 aser 81 buba nung takokba goal 2-ji agüja, par DYA telok nem takok ngudaktsü.
Tanü mezüngbuba asaya nung OCYU teloki goal 5-0 agi Stardom United FC telok madak takok angu aser OCYU asayar, Imnasashi-i goal 3 tashi agüja, hat-trick yanglu.
Tanabuba asaya nung SSS telokia goal 5-0 agisa Youngstar S/C telok tsükdaktsü aser SSS asayar, Ngulie-ia goal 3 tashi agüja, par telok asoshi hat-trick yanglua liasü.
Hills aser Socianian telok nati par 4 buba asaya tenzüker minute ishika tsüngda nung tsüngsang kanga mejungi akümba yong asayaji tembanga masayatettsüsa aküm saka asüng, Brehostibar anepdang 8:00 ako nungi tenzüka, tanüngba asaya mapangji asaydaktsütsü lemtetba osang ka tayongeri metetdaktsüogo.
“Bodbar nü ticket alizükertemi ticket tasen malizüki Hills aser Socianian telok na tsüngda asaya reprangtettsü saka 5 buba aser 6 buba pre-quarterfinal asaya reprangtsü atembo ticket tasen alizüktsüsa akümtsü,” ta parnoki osang jangjashitsü.
Ano külen, sentong renema ali ama, Elation SA aser Mongsenbai Yongsterz FC na aser Shitilong SA aser Tepenjem Rugo Mokokchung telok na tsüngda 5 buba aser 6 buba asaya asüng anepdang 11:00 ako nungi tenzüka asayatsü renema lir.