Nagaland angh-i alima lendong nungi jenbua alitsü ajungshir

Dimapur, Oct.12 (TYO) : October 13 ya alima ajunga nung alima lendongtsüdong nungi jenbua alitsü asoshi tangatetba agüja amongba anogo “International Day for Disaster Reduction” lir aser iba anogo nung Nagaland angh-i alima lendong nungi kümzüka alitsü asoshi nisung shiai shilem agitsüla ta metetdaktsüogo.
Taküm küm iba anogomong nükjidong ya “Ashitsü atema taküm alir, Tangatetba agütsütsü aser tasüba ajema kümdaktsütsü ( ‘Live To Tell: Raising Awareness, Reducing Mortality’) ta agüja lir. Iba omeni aginüba ama asenoki inyaktsü atema kati ka ajungshitepa inyakdi ta anghisa metetdaktsü.
Alima lendong nungibo shinga jenbua mali, saka ano Nagaland-bo alima lendong menoknok ama ataloktsü ana nung dang alinungji kanga kümdanga alitsü nüngdaker ta paisa ashi. Iba ama lendong ajemdaktsütsü atema ali amshiba yimya (Land use planning), tzü mopung memenendaktsüi ayuba aser temzüng ozüng takang lateta yur item ajakji timi inyaktsüla ta paisa ashi.
Iba mapa nung ya lokti tentettem aser kija kibong ajaki tangatetba agi inyaktsüla, kechiyong ibaibo ajak atema lir, anungji Nagaland nung ki asüba yimya ya lendong mataloktsüsa yangludaktsütsü atema ozüng tajungba küma latettsüla aser lendong aruba metettsüsa alitsüla. Ano, lendong atalokdang jet ta yariteptettsüsa inyakyim shitak lateta alitsüla ta anghisa metetdaktsü.
Iba ama lendong nungi kümzüka alitsü asoshi nübortem nem tangatetba agütsütsü atema kaktereju nung kaketshirtem rongnung otsü zülutepba, noksa yangluba aser o jembi toktepba ama sentong ayongzüka akatsüla aser yimdong nung nübortemi angutsüsa o zülur yutsütsüla ta anghisa metetdaktsü.

You must be logged in to post a comment Login