Rara melen Yimjung

~ Imnaonen Lkr, Ungma.

O Pong mazü, O Pongetsü mashi, osü majung, o teküprak, o tetsürok, iba osü yagi kinüngtsü kinüngbo tsüngda sobaliba nung ongtang adoker. Ibaibo injang aser bomb tang nungi tesashiba (tetsür tebur tsüngda)
1. Tejen aser tasenba putu, Tejen Lai aser Tasen Lai, tena medemdanger. Tejen Lai nung ozüngji ozüng, tenük melen tenük, tebu melen tebu, kechi züluogo aji tatem, kechi ozüng ali tanü tashi parnoki nisung süngzü agi alenseta südaktsür, parnoki tekolak lepzüka südaktsür. Saka alima telongjem koba dang UNO ta ajar, parnoki ashi, alenseta südaktsüba koba dang Pangshi taka ajar, yabo nisung ka anema temeten samatsür, anungji iba ozüngjibo agientsü mepishir. Isaia ainkar ajanga shinba, Yisu asotsü küm aika lia Yisu yimsüsüba arur ataloktsüba shin, alima nung rara malitsü, parnoki pei nok agi mertsüng atsüngtsü, aser nü agi kolem nok atsüngtsü.
Kini kin anema nok memekangtsü, parnoki raratsü mangazüktsü, iba shin o sülen, küm aika süir Yosef nungi jabaso ka aso pa tenüng Yisu, Pa dang yimjung Chuba chir ta ajatsü. Aser pa ajanga ajemrepba kin nüji küma yoktsü. Iba sülen Yisui nisungtem dang ashir, yimjung yanglurtem tepelatsü, sura yimjungji koma yanglutsü, adinanutem tetsü nu menden ka nung kasa ita tatazük apenba tebur aser tetsür koda pendangtettsü, tsüraburi tushir, tajungsang, tajungla, ibai tsüraburi agütsüba senmang iba yagi asen kibong nung sobaliba tajung sayur, ibai atep nungi adokba tasü tait tetsürtem reprangang.
1951 küm Naga tenem kin shinga lar-a masütsü ta nangzükteper ayameso, iba olajai yamai liasü. Nenok India nunger Naga lima nungi oadokang ta ayimoktsü, iba sülen nung jagi asen Naga nunger India sorkar Army yoka kangshitsü tenzük, iba tekangshi marem teburtem den külemi tetsürtema tongpang nung nokdak. Kodang yimtsüngtem nung sepaytemi tebur merenshi, kinüngbur kümzüktsü merangdang tetsüri tebur den külemi tasüba ajuru. Tanü lanurtemibo memetettsü südi. Iba ama tongpang ka ajangdangang senso züji jangja meteter. Tanü temelenshiba putu tebur dang nungi tetsüri mapa aika nung jenjang tajungba tongteter.
Officetem nunga parnoki tenendakba aser ochi tashiba inyaktetba osang ajanga angashir. Asen lima ajanga orr India lima nung tzüyim sepoy aser anüng nung yimzüba tayimtsü anir ajak nung shilem tajung agiteter, parnoki tebortem den kasa prangpong, bomb tesashi ajak amshia tongpang nung nokdaker. Alima kanga melenshiogo ta sayur.
2. Naga nunger mezüng jenjang toktsür asen sasa melitettsü, India dak neploker alitsü atongtet, küm ishika süia arudang yimsüsür shimtsü election agitsüsa aküm, shir telok timba adokdir iba telok nungi Govt abentsü ta, ayimoktsü. Election nungji pei temeten kija vote kanga senti kija temetenji ulura shingaia shinga nokdangtsü makok iba sülenjibo kija temetenji kanga sadema aküm. Iba sülen nungibo jila nung alirtem karibo pei nisung nem masü Hindu nungerang pa vote agi yari aji pa atema temeten.
3. Tamangba tsütsü reprangra joko asen lima nung yimsü balala paikati arangoka yur amangteper. Yimtsüng ka nung tenla ki ana asem tashi yanglur tokteper, shiba kotaki atutsü, shir telok timba atutsü. Kinüngbo tenla ki kati aor, kinüngtsü kati aor, tanübo pei ateb tashi raksatarji. Tetsüri tetsür den, teburi tebur den kibong akümtsü yangluteta likaji, iba mapatong yaa asen Naga nungerisa tekeraba agizüktsü sudi, kechiyong Naga nungerji yakta inyaknüba kin.
4. Tejen putu limapur mapang alu tenzüker anisüngzüka benjungtep, tensa den apet shiruru tepseta yi menoktena yur anogo terok ken tajung tentepa mapang den apet pari kechi junger ta bilem ajakji inyaka anogo süidaktsü. Iba sulenjibo yim ajak nung Yisu yimsü amanger timba küma Moji benjong tu mekai aküm. Tesülen kaketshirtemi shisatet südi, iba benjong ya mongpu takzüba den sobaliba tajung keta lir , anungji iba mongpo metetsü kaketshirtemi anir Khrista yimsü dak apet ama sobaliba tarensen yar tsüngsang aser sobaliba ken angazük. Saka achiajemtsü nung kanga asüngteta temerük yimya nung aji oda monga aru. Saka tanübo lanuri Moatsü mong tenüng atemer tapu ajak arangoker akhi yimya benshia mojiteper. Iba Songang benjong nung tetsür karbo tebu mejangjaba tanur bener maksü marem aji indoktsü merangdang taküm aika lendong ajurutsü.
Tanü aritepa ainba putu, shibai alizüng tongteter yangji telemsa kecha mali alimaji par meyong. Tebur ishika tzümaleni aludang Jang tasü ka ngua aji sensaa alemtsü bilem, parnok rongnung kaji kanga shisa taka liasü, pai yakta tang tenarongji ni agitsü ta, ano tebentongjia ni agitsü ta sür züb ta süiter raktep, saka pa ket nung Nok maka, nüa maka, parnok medemer dangang lepzükjang ta ashi, tanü asen putu ibaji mesüka liteper. Iba mulungjang nungi na pilaa liang. Tenka lim nung alidang tajung inyaktsü aritepang. Küm ishika tsüngda nung asenoki ngua aruogo, yimlitem samar Atunutsük Petinu mesüka Chuba menden nung mener perangshia alirtem, merang ajok amer mezü sapang nung züka ozüngji ozüng ta arua yimsü asürtem tu kenü anogo tanüi Koya por amshia mesüshir mesüka merang tekang nung sepangar o bendang dak pai kecha meshitet ama, shisa makar aji oda ajurur.
Tatem nung süngzü tela ka dang pai kecha meshitet pei taküm tempang. Tatishitsü o ka agi, süngdong tulu alima ramoka aintsüba sürnung asen kilem nung pot tila ka nung ali ishika enoker yangji atemer aser mapang shia kosang tu lanu adokba kanji agi mejepba rajang kümdaktsür. Adianu shiba südir süang, na menden tajung nung mena alidang nü mulongjangji sadem sadema nür lima aniang. Amen