Home Minister Patton-i Kezocha police station semzüktsü

Kezocha (Kohima), October 13 (TYO): Brihostibarnü state Home minister, Y. Patton-i Kohima district kübok Kezocha Police Station semzüktsüogo.
Iba sentong nung jembidang Patton-i, 2012 küm state sorkari iba police station amenoktsü asoshi sangdonga liasü, saka infrastructure terenlok nüngdakba ajanga metenzükteti aruogo, ta metetdaktsü.
Naga lokti nung terenlok atema ali kibur onük ya tebilemtsü tulu ka kümogo, saka iba station amenoktsü asoshi Kezocha nüburtemi ali agütsüba asoshi pelar, ta pai ashi.
“Asenoki sorkar dang nungi terenlok aginer, ajisüaka asenoki ali magütsüner, aser ali mengura terenlok alitsü makok,” ta minister-i ashi.
Iba police station amenoktsü atema ali tenlaba ajanga Kezocha nüburtemi Naga nunger dang, ‘terenlok balala atema ali agütsütsüla’ ta tatishitsü tajung ka sayuogo, ta paisa ashi.
“Chief Minister, T.R. Zeliang aser NPF Tir, Dr. Shurhozelie Liezietsu kübok tang aliba sorkari state terenlok aser nüburtem atema inyaktsü melunga lir. Ajisüaka sorkar den amalitepa inyaktsüji nüburtem teinyaktsü mapa lir. Nüburtem ajangzüktsü atema dang süra tebilemba onük tajung aser temetongshitsüba onüktem benoktsüji nüburtem teinyaktsü lir,” ta paisa ashi.
Iba kasa sentong nung MLA, Kropol Vitsu-ia, police-i nüburtem tajungtiba nung tenzüktettsü asoshi nüburtemi iba police station den amalitepa yaridaktsüner, ta ashi.
DGP Nagaland, LL Doungel-i mapang tatsüka jembidang, police department ya nüburtem teyari aser amalitep nüngdakba department ka lir, anungji nenok tajungtiba nung tenzüktettsü asoshi nenok teyari nüngdaker, ta ashi.
Kohima SSP, Joseph Hesso-ia, iba Police Station yagi jila ka den yim teku ayimjemtsü, aser iba Police Station nung Sub-Inspector ka kübok police 25 alitsü, ta metetdaktsü.
Sentong nung MLA aser Nagaland State Mineral Development Corporation Mendenbuba, Dr. Neiphrezo Keditsu aser Kohima Deputy Commissioner, Rovilato Mor den tongtibang nisung aika dena liasü.