Tanü nungi ANAHTA-i longkak aittsü

Dimapur, October 16 (TYO): Taküm March ita nungi sorkari All Nagaland Aggrieved Hindi Teachers Association (ANAHTA) nem itasen magütsüba atema tejashi sayua October 17, 2016 nungi tesayurtem class nung medeni longkak aittsü, ta ANAHTA sangdong ka nung metetdaktsü.
Onok mesüzüktsü atema sorkari ita ka indang itasen agütsütsü ta ashi saka onoki ibaji magizüker. Onok mapa nung shimokba sülen nungi sorkari kasa mapa dang inyaka arur, anungji onoki taoba mapang ashiba ama ‘no work no pay’ tangatetba nung longkak aittsü, ta ANAHTA V.P. Monthung-i sangdong nung shia lir.
Iba dak sendakba atema tanga osang ka mesangdong tashi ANAHTA tesayurtem ajaki tetuyuba sülen anidaktsü mepishir, aser ano sorkar o nija school tem nung Teachers Incharge temi onok indang khuret angatettsü ayongzüker, ta sangdong nungsa shia lir.
ANAHTA V.P-isa ketdangpurtem melentsü atema district nungi teshimtet nübotem den rongdak senden ka amentsü ayonger, ta ashi.
October 19, 2016 anüngdang 1:00 ako nung Upper Chandmari nung senyur kidang iba senden amentsü aser iba senden nung August 11 nü agütsüba district representatives format bener arua agütsütsü nenshia metetdaktsü, ta ANAHTA mendenpurisa ashi.