Sorkari NH nokdangtsü memelar

Dimapur, October 16 (TYO): Coordination Committee of Civil Society Organisation on Fuel Adulteration (CCoFA) i October 17 nungi NH 29 nokdangtsü ayongzükbaji ozüngi memelaba sentong ka lir, ta tanü Abhijit Sinha, IAS Home Commissioner, Nagaland-i sangdong ka nung metetdaktsü.
Osangtem tejangja benokba sülen June 27, 2016 nü Police aser administration-i Dimapur aser Chumukedima nung tesem trok mita aodang, item tesem nung ozüng alema totzü meyoktepba mapa inyakba kuli angu, aser iba dak sendakba nung Diphupar PS aser West PS nung ken o ka ka benok, ta sangdong nung shia lir.
Iba onük ya tulu ta agizüka, state sorkari July 15, 2016 nü IG (Range) lenisüba kübok SIT ka tentet aser parnok nem bushisüngdang asütsü mapa nungloktsü, ta Sinha-isa ashi.
State adena oa bushisüngdangba den ano Forensic Science Laboratory (FSL) reports manguba ajanga SIT-i bushisüngdangba maparen ano metembangtet aser iba jagi chargesheets magütsüi lir.
Iba onük atema September 23, 2016 nü “Coordination Committee of Civil Society Organisation on Fuel Adulteration” ta ser telok kati sorkar nem tezüluba ka nung ken o anaji CBI nem bushisüngdang südakjang aser ibaji meinyakra, state nung aliba NHs nokdangtsü ta amokmerena agütsü. Iba asoshi October 15 nü Cabinet senden ka amendang, SIT-i bushisüngdanga aruba osang benoka lemsatep aser tang bushisüngdang tesüdak nung bushisüngdanger memelentep tajungba ta bangzünga renem. Cabinet-isa DGP dang SIT-i anogo 10 nü tsüngda okadak ken o tem benoktsü atema tetuyuba agütsü aser Cabinet telemtetbaji Co-ordination Committee nem sangokja, lenmang nokdangba sentong magitsü mepishi, ta sangdong nungsa ashi.
Ajisüaka, Co-ordination Committee-i October 17, 2016 nungi NH 29 nung sorkar meyong garitem aser totzü abenba garitem mesenzüdaktsütsü lemtetba ama inyaktsü ta metetdaktsü. SIT-i FIR ana nung benoka aliba onüktem ajak bushisüngdangtsü ta sorkari nangzükaka, Co-ordination Committee-i lungkak aittsü ta metetdaktsüogo. Gari lenmang nokdangba ajanga nüngdakba chiyungtsü aser osettsüsettem belenba aser nüngdakba service aika asoshi tetsükdaktsü ajurutsü, anungji Cabinet-i iba sentong ya ozüngi memelaba sentong ka ta tanü lemtet.
Anungji, nisung telok mesüra kijai senzüsenbonger nem timtem kecha magütsüdaktsütsü atema district administration aser police-i teinyaktsü mapa inyakang ta sorkari tetuyuba agütsüogo, ta Home Commissioner-isa sangdong nung metetdaktsü.
Iba sentong nung public-i shilem magitsü aser ozüng amertem den amaliteptsü mepishir, ta paisa shisem.