CCoFA-i tanü nungi Highway nokdangtsü

Dimapur, October 16 (TYO): October 17, 2016 nungi CCoFA-i highway nokdangtsü ayongzükbaji Cabinet-i ashiba SIT mesüra Chargesheet den tesentaktep kecha mali, saka state sorkari anogo 15 tsüngda CBI nem bushisüngdang mesüdaktsüba asoshi ayongzükba lir, ta Media Cell, CCoFA-i sangdong ka nung metetdaktsü.
SIT-i anogo asemnü mesüra anogo 10 nü tsüngda mesüra ita ka sülen ken o benoktsü ta ashiba atema CCoFA-i süoki ia mebilemer aser SIT-i iba ken o tatembang kati arua mebushitettsü, kechiyong ozüng alema totzü meyoktepba maparen ya tai tonglokja alir nisung 5-i dang inyakba masü, ta sangdong nungsa shia lir.
Iba maparen nung Food & Civil Supplies Department aser yimsüsürtem densema lir. SIT-i tesüiba küm 15-20 tsüngda F&CS department ketdangsertem anema ken o benoktsü makoktsü ta Naga nunger public-i jangjajangja meteta lir. Tetenzükdang yongi sorkari SIT ji teka alenbanger ang tentettsü aser iba jagi ACAUT-i tesüiba mapang SIT tentetba magizüker ta metetdaktsüogo. Anungji, sorkari public mashileni anitsü memerangtsüla, ta CCoFA-isa metetdaktsü.
CBI-i bushisüngdangba ajanga ochimashi agi sünger aliba F&CS department merüktettsü ta imlar aser ibaji ajanga Naga nunger kibong aika ajangzüktsü ta CCoFA-ibo bilemer. Anungji, iba onük nung Naga nunger public-i CCoFA pusema nungittsü aser ano sarasadem agia yaritsü mepishir, ta Media Cell sangdong nungsa metetdaktsü.
State sorkari yariteptsü melena tokteptsü asoshi ang mapa inyakba aitsür. Longkak aitba sentong ya teyari manguba sensotem külen, aser sorkar tasü ka tsüngda rara ka mesüka lir. Sorkari tokteptsü tangatetba nung mapa inyakba ajanga tai tonglokja alirtem- Dinanath, Srikanth, Umesh, Naval aser Ajay Prasad nunger pusemba aser ochimashi maneni nungita yariba kuli sayur, ta sangdong nungsa shia lir.
NFC Gate, Dillai aser Chumukedima Check Gate dak alaka tanüngba Highway-29 piyongji Zubza, Peducha aser Medziphema nungi lanurtemi anüktsü aser longkak aitba mapang timtem kar danga ajurua, iba tebilemtsü khuretji sorkari abentsü, ta CCoFA-isa metetdaktsü.
Iba sentong ya linük temzüngi melaba ama aser nübor nem temeten agüja aliba ama timi dang agitsü, anungji ozüng amertem shisa mebulutsüla. Ajisüaka, sorkari ozüng alema aser tashiyim amshia longkak aitba sentong nung timtem agütsüra, public-i Gandhi’er tangatetba ama peisasa pudaktsütsü (Jail Bharao), ta Media Cell sangdong nungsa shia lir.