Exhibition match nung ASU-i NSF madak takok angu

October 16, 2016 nü Kohima Local Ground nung 17buba NSF Martyrs’ Memorial Trophy den repa exhibition match ka asayaba sülen Angami Students’ Union aser Naga Students’ Federation nung ketdangsertem den tangar kar dena külemi tangokba noksa ka yangi angur.

Kohima, October 16 (TYO) : Tang tasayadak 17buba NSF Martyrs Memorial Trophy nung shilem ka ama Naga Students’ Federation (NSF) aser Angami Students’ Union (ASU) na tsüngda exhibition match asayaba mapang tesüiba mapang NSF tongti tezülur aser tang ASU Tribunal Member, Neizokhotuo Belho tongti tesemdanger liasü.
Telok anaprongi kangasa junga asayaba ajanga 4-4 nung tembang.
ASU nungi striker Mego Ratsa (10)-i asaya tenzüker minute 10, 15 aser 25 nung goal 3 yoka hat trick angu aser goal kaji Zekuseto (15)-i minute 52 buba nung yoka par telok goal 4 aküm.
3-0 aliba mapang NSF-ia kanga junga asayatsü tenzük aser asaya tanabuba tesadang nung taoba mapang NSF Tir Tongpang Ozukum-i goal 3 yoka paia hat trick angu aser par telok atema goal pezübubaji tesüiba mapang NSF Tir Kelhouneizo Yhome-i minute 67buba nung pa kijaia ASU defender tem kanga junga paitoka bener lur yokba ajanga telok ana 4-4 nung tembang.
Asaya temer penalty metsütepba nung ASU-i takok angu.
Asaya tenzütsü mapang o jembidang Neizokhotuo-i, NSF Trophy ya state nung kanga dang tongtibang asayamung ka kümogo aser iba asayamung ajanga football asayar nem sabang lapokja iba asaya nüngtugu kümdaktsür, ta ashi.
Paisa, NSF Martyrs trophy ya state balala nungi aser kidanger state tem nungi football asayartem longjemdaktsütsü asoshi apu ka amai lir aser iba asaya ajanga lokti balala tsüngda temeimtep adokdaktsür, ta shisem.

OCTOBER 17 NÜ ASAYA YAMAI ALITSÜ
1. Senapati FC vs Nagaland
Police (Blue) @ 12Noon
2. Asüfü Christian Institute vs Nagaland Police (Red) @ 2PM