Manipur nung ghonda 18 longkak ait

Imphal, October 16 (Agencies): 1949 küm Manipur India Union nung dendaktsübaji tashiyim amshia loktepba lir, ta aija iba anema Manipur nung telungpur telok aika indang coordinating committee, CorCom-i Honibarnü longkak aita liasü.
Ghonda 18 longkak aitbaji Hokolbar ayaterm nungi tenzük, aser ibaji ajanga Inphal dang masü saka tanga district headquarters aser jilatema kongshia liasü.
1949 küm September 21 nü Manipur Maharaja, Bodhachandra Singh aser India sorkar na tsüngda loktepa sign asü, aser kasa küm October 15 nü Manipur ya India shilem ka akum.
Honibarnü Imphal Khwairamband Bazaar shishilembadak shibanga liasü iba den külemi interstate aser inter-district transport services-a mesenzü.
Ajisüaka rongdak nüngdaktem, tamangba lokti sentongtem aser nüngdakba services den tayimtsü senzübabo menokdang.
State yimtiba nung shisaliok rejutem shibang aser sorkar office nunga mapa inyakertem kanga azünga liasü.
CorCom-i taoba mapang state tashi akhanger aser parnoki ashiba agi, Maharaja ji house-arrest nung ayu aser India den longjemtsü asoshi kangshia sign südaktsü, ta ashir.