Taküm küm matemdangsa India-i UN linük 192 semdangtsü

New Delhi, October 17 (Agencies): Yimtenren ken o balala atema taruba ita asem tsüngda Narendra Modi’er Cabinet minister temi linük 68 semdangtsü; Pakistan nungi kiralongrartemi Uri nung army camp amakba sülen September ita tatemlen India-i Pakistan arrtsülen kiralongrartem tesep maka liasü, aser iba dak sentakba nung October aser November ita tsüngda India-i item linük timbaka semdangtsü.
Tesüiba küm ana tsüngda India-i linük 68 den temaba jenjang nung senden mamen ta External affairs ministry-i jangjatetogo. Item linüktem semdangtsü asohi Modi’er cabinet minister tem nem mapa lemzükja liasü.
Iba dak sentakba nung June nungi September ita tsüngda External Affairs minister, Sushma Swaraj-i December ita tatemlen tashi nungbo item linük semdangtsü atema shidi ajanga metetdaktsüogo.
Osang ajanga angazükba agi, item linük timbaka October aser November ita nung semdangtsü sentong lir.
Home Minister Rajnath Singh nem Hungary semdangtsü atema lemzüktsü, iba den kasa Urban development minister nem Denmark aser Iceland lemzüktsü, road transport minister Nitin Gadkari nem Panama aser Nicaragua lemzüktsü, Ananth Kumar nem Tongo Republic, Ravi Shankar Prasad nem Estonia aser Latvia, Ramvilas Paswan nem Mauritius, Chaudhary Birender Singh nem Germany, Maneka Gandhi nem Romania aser Jual Oram nem Botswana linük lemzükja lir.
Osangbenertem den jembidang MEA otongdar, Vikas Swarup-i, “Tesüiba küm ana tsüngda onoki temaba jenjang nung senden makatetba linük 60 dak tema jangjaogo. Anungji onoki item linük semdangtsü asoshi minister tem nem lemzüktsüogo,” ta metetdaktsü.
Minister tem dang December ita tashi nungbo item linük semdanger linük balala den amalitep aser tesentaktep osang metetdakjang ta tuyuogo. Linük 68 ji densemabo taküm küm India-i UN linük 192 semdanger asütsü.