Microsoft-i Cloud services agütsütsü atema sorkar temelaba nguogo

New Delhi, October 18 (Agencies): India sorkar aser sorkar kübok tentetba department balala nem Cloud service agütsütsü atema Microsoft tentet nem temelaba agütsüba osang ka India, Ministry of Electronic & Information Technology (MeitY)-i tanü, Mongolbarnü sangoktsüogo.
Tan sorkar nungi temelaba anguba sülen sorkar tentet balalai par digital temelenshi agitsü, Information Technology (IT) mapatong takok ngua inyaktsü aser lokti tentet tajungba küma melenshitsü atem Microsoft Cloud amshitettsü.
“Microsoft Cloud-i alima jenjang nung timtem balala nungi kümzüktsü, osangtsüsang miima ayutsü aser India sorkar tentet balalai par mapatong takok ngua inyaktsü service agütsür,” ta Microsoft tentetia metetdaktsü.
Tan Microsoft Cloud amshitsü temelaba anguba sülen India sorkari pei nübur nem e-governance service, rongsenren tajangzük, temang anema alitsü aser kaketshisatsü bushitsü teyari agütsür mapatong nung Microsoft-i India sorkar den yariteptettsü ta par tenteti shisem.
MeitY ya public sector nung tentetba tentet ajunga, sorkari senotsü teyari agütsüba tentettem, state aser nija aser telok balalai tentetba tentettem ketdang asüba tongti tentet lir.