State nung 1buba Women Police Station semzükogo

Kohima, October 18 (TYO) : Nagaland nung mezüngbuba Women Police Station tanü, Mongulbarnü state yimtiba Kohima nung Director General of Police (DGP) Nagaland, L. L. Doungel, IPS-i semzükogo. Iba Police station nung Officer in Command, Inspector Ari Thapru-i anir tetsür police 26 alitsü.
Kohima Women Police Station den phone no. 8575045509 ajanga tongteprateptettsü.
Sentong nung jembidang L. L. Doungel-i, anünga aliba district 10 nunga women police station lapokyonga aotsü, ta metetdaktsü.
State nütsüng yongsük tesadang ka shi tetsür lir anungji tetsür tanur aser taintem nem shisatsü shitak agüja maongka tajung magütsüra lokti merenloktsü, ta DGP-i ashi.
Pai, tetsür tashiyim agi raksaja yimya tamajung benshiba ken otemji tetsür dak sendakba ken o tem lir aser itemji benoka bentettsü atema mapang talangka nungi women police station nüngdaka liasü, ta shisem.
Sentong nung Deputy Inspector General (Range) Limasunep Jamir, Naga Mothers’ Association Tir Abieu Meru, Kohima Deputy Commissioner Rovilatuo Mor aser Kohima Village Council Medoselhou Keretsu nungeria o tatsütsü jembi.
Iba sentong nung mendenji Protocol Officer DEF Kohima, Kilang Yanger-i liasü, PUBC Kohima, Women leader-i temoatsü meshia sarasadem, Senior SP Kohima Joseph Hesso-i tarurtem pela agizük aser SDPO (North) Puzoto Khatso anküp tepela o jembi.