Chief Minister-i nangzükba sülen CCoFA-i lungkak aitba anena atar

Dimapur, October 18 (TYO) : Nagaland chief minister T.R Zeliang-i inyaktsü ta nangzükba sülen Co-ordination Committee on Fuel Adulteration (CCoFA)-i Mongulbar nungi highway nokdangba anena atatsü telemtetba agi.
Mongulbar anepdang T.R Zeliang-i Dimapur nung par kidang CCoFA züngsemtem den ajurutepa senden amen aser iba mapang pai SIT team-i state sorkar nem report ka agütsütsü atema anogo 7 meshizük, ta CCoFA-i metetdaktsü.
SIT-i agütsüba report nung ashishiteptsüsa keta lir, bushisüngdang balaka südaktsütsü ta chief minister-i nangzükogo, ta CCoFA-isa ashi.
Mongulbar anüngdang Diphupar village council hall nung CCoFA pur rongdak senden ka amen aser idangji onüktem benoka jembitepba sülen lungkak aitba sentong anena atatsü telemtetba agi.
Anogo ananübuba lungkak aitdang, Chumukedima tesem nung lungkak aitertem aser police tsüngda mangatettep adoka raradang nisung kar yiruyibong asüba osang angazüker. Iba mapang police-i tenük amdaktsüba mozü dena amshi.
Tanep 7:40 ako meta SIT züngsem ka dena police-i CCoFA züngsem 9 apu aser parnok NAPTC nung aliba quarter guard ka nung ghonda ishika puoka ayu. Iba sülen parnok ajak PR bond ka nung sign südaktsüba sülen chiok.
Police-i parnok züngsemtem apubaji ozüng alema inyakba mapa ka ta CCoFA-i aitsür aser parnoki police ketdangsertem dang tashiyim agi nisungtem apuba police tem bushitsü atema takhangba agütsüogo.
Tanep CCoFA züngsemtem apuba osang angashiba sülen volunteers ajak Chumukedima NAPTC gate nung adenshi aser parnoka puang ta ola adoka lungkak ait.
Iba mapang police-i lungkak aitertem dang ‘state sorkari iba sentong ya ozüngi memelaba sentong ka ta sangdogogo anungji nenok senshiang’ ta ashi. Ajisüaka, lungkak aitertemi iba tetuyubaji magizükba agi police-i ajok agi züka aser tenük amdaktsüba mozü amshia parnok senshidaktsütsü merang. Iba mapang police dena nisung 6-7 shi yiru aser lanur lennir ka tekolak kanga mejungi yiru.
Iba tatalokba sülen national highway anasa aliba dokantem ajak shibang.
Ano, külen tensa mejungi akümtsü ta bilemba agi District Magistrate & Commissioner of Police, Dimapur Liremo Lotha, IPS-i Chumukedima telongtet nung aliba national highway nung taruba ghonda 24 atema Section 144 CrPC ozüng agütsü.
CCoFA-isa, “lungkak aitba sentong tembanger masü anungji nisung ajaki taruba lungkak aitba shilem nung adentsü asoshi renema atatsü mepishir.” ta metetdaktsü.