Philippines Tir, Duterte-i China linük semdanger

Beijing, October 19 (Agencies): Philippines Tir, Rodrigo Duterte-i anogo 4 agia China linük semdangtsü nükjidong nung Beijing yimtiba tonga ogo.
Par linük den kanga junga sentaktepba linük, US den tesendaktep mejungi küma, China den tesendaktep taoba mapang nungi tang tajungba küma yanglushitsü nükjidong nung Duterte-i tan China semdangtsü tenzüka lir.
Duterte-i taoba anogo 3 tashi Brunei linük semdangba sülen par Philippines-i meshilangi tan Beijing bushia aoba osang angazükogo.
Par linük ana tsüngda adokba South China Sea (SCS) den sentakba mangatettep ken o nung ajemdaker United Nations (UN)-i taküm July ita agütsüba o bendang den sentakba onük benokba den Philippines-i par peisasa pei madak yimsü asütsü temeten China nem bendanga magütsütsü renemba olen ka Duterte-i China semdangba jakdang metetdakja liasü.
SCS tzüyim shilem tulubaka par kija meyong ta züngshitsü temeten China-i ngua mali ta UN okadaki o bendang agütsü saka China-i iba o bendangji magizüktsü renemba osang metetdaktsüogo.
Duterte-i China lenirtem den ajurutepa senden amenba jakdang Beijing nung alir Philippines nüburtem den ajurutepba osanga angazükogo.
Duterte-i China lenirtem, China Tir, Xi Jinping; Ato Kilonser, Li Keqiang aser National People’s Congress mendenbuba, Zhang Dejiang nunger den tan Brehostibar nü ajurutepa, par linük ana tsüngda shishilembatsü tezüngzüktep agitsü sentong renema lir.
Pai maneni Bank of China nung executives den tan Hokolbar nü ajurutepba sülen par Philippines-i meyipa aotsü sentong lir.
“Duterte-i tan China semdangba ya otsüsütsü mera ka agir lir aser ozü linük ana tsüngda tesendaktep junga akümtsü tetenzüker lir,” ta China Foreign Minister, Wan Yi-ia metetdaktsü.