Bhubaneswar Hospital lendong atema NHRC-i tetuyuba agütsür

New Delhi, October 19 (Agencies) : Bodbarnü National Human Rights Commission (NHRC)-i Odisha sorkar dang October 17 nü SUM Hospitals nung nisung 20 rongsetba atema tetuyuba ka agütsüogo.
Bhubaneswar nung aliba SUM Hospitals-i lendong nungi jenbutsü atema teinyaktsütem meinyakba atema 2013 nunga tetuyuba agütsü saka mozüki ketdangsertemi tashi manga, ta NHRC-i ashi.
Odisha nung mozüki 568 aliba nungi mozüki asemi dang fire safety requirements tongteta lir aser iba ya state sorkar tashimaitba ajanga lir, ta NHRC-isa shisem.
“Ketdangsertemi zübazüba toktsüba aser teinyaktsü tim meinyakbaji, shirangertem indang temeten anema inyakba lir. State ketdangsertemi mozüki aika fire safety clearance melii lapokdaktsüba atema aoksar” ta Commission-isa metetdaktsü.
SUM Hospitals nung kitsükkirong lendong atalokba atema Odisha sorkari taruba hopta trok tsüngda osang ka agüjang, ta NHRC-i State Chief Secretary ajanga tetuyuba agütsüogo.
Osang agütsüba nung tasür aser yirua alir nem teyari agütsüba indanga densemtsüla, ta parnokisa ashi.
Hombarnü SUM Hospitals nung aliba Dialysis Ward indang ICU nung kitsükkirong lendong ka atalokdang nisung 20 rongset aser 106 yiru. Iba mozükidang yipden 750 aser intensive care unit 25 lir.
Miji Dialysis Ward indang Operation Theatre nungi adok aser iba sülen ICU aser temeket aliba units nung kaoloka arong.
Iba tatalokba atema state sorkari bushisüngdang asütsü tetuyuba agütsüogo aser ano Medical Education & Training (DMET) Director-i yirua alirtem ajak angati yaritsü ta nangzükogo.
Iba dak sendakba nung mozüki ketdangser pezü tashi puogo aser kibur jia kobi melii aputsü ama lir.
Bodbarnü Union Health Minister, JP Nadda-i SUM Hospitals semdang aser yirua alirtem den ajurutepogo.