Nagaland nung aluyimbaren meyipa reprangshia jembi

Kohima, Oct.19 (TYO) : Akhidangbo aluyimba maparen ya pei chiyongtsü züsentetba mapa ka dang liasü saka tanübo aluyimba ya industry ka ama kümogo, anungji aluyimba dak sendakba maparen nung nisung aikati shilem agia mapa aika inyaktetter ta Parliamentary Secretary, Agriculture Dr.N.Benjongliba Aieri metetdaktsü.
Tanü Bodbar nü Hotel Japfu, Kohima nung Agriculture department sentongtem meyipa reprangshia shisalemsatepba sentong ka nung tongti tesemdanger o jembidang pai iba ken o ya metetdaktsü.
Iba ama sentong ayongzüka agiba ajanga aluyimba sentongtem tajungba küma yanglushitettsü aser state nung chiyongtsü peria senzütettsü ta Dr. N. Benjongliba Aier-isa metetdaktsü.
Tanü putu nung technology tapu balala amshia temetetba shisatsü ajanga aluyimbaren melenshia aoba ajanga chiyongtsü tajungba aser aluyimertema tajangzük tajungba angutsü ta paisa ashi.
Taoba küm ishika Nagaland nung aluyimbaren junga odagi saka tang tashi state nung nübortem peria mezüsentetter, ibaji state nung sentong yanglurtemi temulung magütsüba ajanga lir, anngji tang nungibo department nung alirtemi aluyimertem dang alu ayimtsübaren timi sayua yariteptsüla ta Dr. Benjongliba-isa metetdaktsü.
Iba kasa sentong nung Commissioner & Secretary aser Agriculture Poduction Commissioner,T. Imkonglemba Ao, IAS-i okila jembidang, department nung inyaker aser scientist-temi alutyimertem dang tajangzük lia alu ayimtsü indang temulung agüja sayutsü ajungshi.
Iba sentong nung menden Agriculture Director, Rongseninla liasü aser Additional Director, Agriculture (I) Administration, Helie Rupreo-i tepela o metetdaktsü.