Aniston o Theroux na Los Angeles nung mima kibong akümer

Los Angeles, August 07 (Agencies): Taoba mapang ‘Friends’ television sentong nung tongti shilem agir, Jennifer Aniston-i tetong, Justin Theroux den küm 4 shi kazüba sülen tenati Los Angeles nung tangar shinga dang memetetdaktsüi miima kibong akümba osang ka TMZ.com-i tanü Hokolbar nü metetdaktsüogo.

Küm 10 tejaklen Hollywood actor, Brad Pitt den balala, Aniston-i actor aser Tropic Thunder film nung amshitsü oren mejemsang, Theroux den 2008 küm ajurutepa tenati tetongtechi ama kazütsü tenzükba sülen 2012 küm kibong akümtsü nangzüktepa liasü.

Aniston aser Theroux nati kinünger 70 shi jaokba sülen tena telikdak Bel-Air kidang yashi, Brehostibar nü kibong aküm ta People magazine aser US Weekly nati osang jangjashitsü.

Tena kibong akümba noksa kar TMZ.com-i par website nung maloktsüba osanga jangjaogo.

Yashi agiba kiyimba sentong nung Aniston den külemi Friends sentong nung shilem agila, Lisa Kudrow aser asaya menür Ellen DeGeneres o Chelsea Handler nati adenba osanga People aser US Weekly nati metetdaktsü.