US Defense Secretary, Carter-i Turkey linük semdanger

Turkey Tir, Recep Tayyip Erdogan (Achijilen)-i par linük semdangsang, US Defense Secretary, Ash Carter den Ankara yimti nung ajurutepdang agiba noksa ka yangi angur. (Ankara, October 21)

Ankara, October 21 (Agencies): US Defense Secretary, Ash Carter-i Turkey lenirtem den ajurutepa senden amentsü nükjidong nung Turkey yimtiba, Ankara tonga tanü, Hokolbar nü ogo.
Carter-i tan Turkey semdangdang par lenirtem den Iraq’er peisasa pei madak yimsü asütsü temeten agizüktsü tajungshiba olen benoktsü sentong lir.
Alima teloktep mitkartemi nungitba Iraq mitkartemi par Mosul yimti Islamic State (IS) kiralongrar telok ket nungi tanaben agishitsü mapatong kanga sashia inyaktsü tenzükba aser iba ajanga tensa mejungi akümtsü akok ta Washington-i tebilemtsü aliba mapang ka nung Carter-i tan Ankara semdanger lir.
Iraq nung tentetba yimti tulutiba tarensen nung tanabuba yimti, Mosul tanaben agishitsü mapatong nung tongti shilem agitsü jangraba olen ka Turkey-i metetdakja lir saka par tongpang nung Turkey mitkartem nem shilem magidaktsütsü atema Iraq-i renemba ajanga par linük ana tsüngda mangatettep adoka, tensa mejungi akümtsü akok ta Washington tang shisabolua lir.
“IS telok anema raratsüren nung Iraq linüki agiba telemtetba agizükdaktsütsü den sentakba onük ajak den benoka jembiogo. Mosul nung IS anema raratsüren nung Iraq-i lemtetba ama inyaktsüji kanga dang tongtipang aser iba onük ya Turkey yimsüsür aser mitkar lenirtem den benoktsü renema lir,” ta Carter-i tanü Ankara-i aoba jakdang metetdaktsü.
Paisa ashiba agi, Mosul yimti tanaben agishitsü mapatong nung Turkey mitkartemi tongti shilem agitsü dang nungi IS telok meshimeshia samatsütsüji tongtipangba lir.
Yaküm, 2015 küm December ita nungi tenzüka, Mosul yimti anüdoklentip tsütsü, Bashiqa mitkar tesepti nung Turkey mitkar züngsem 500 shi Sunni aser Kurd sepaitem nem tongpang raratsü tesayuba agüja lir saka iba mitkar tesep nung Turkey mitkar züngsemtem yutsüba den sentakba mangatettep ken o Iraq aser Turkey sorkar na tsüngda adoka lir.
“Turkey mitkartem nem Bashiqa mitkar tesep nung  alitsü temeten agüja mali,” ta shia, Turkey mitkartemi tekaratiba mapang nung Bashiqa tesep toktsütsü takhangba onük Iraq sorkari benoka lir saka Turkey linüki iba takhangbarenji magizükba den Mosul yimti tanaben agishitsü mitkar mapatong nung par mitkartem nem tongti shilem agidaktsütsü bilemba olen ka metetdaktsüogo.