Delhi: Ozü dak H5 influenza virus aliba jangjaogo

October 21, 2016: New Delhi nung aliba Deer Park nung inyaker ka cycle nung toudak mapang todi (peacock) ozü ka lenmang ajangdanga aoba noksa nung angur. New Delhi nung ozü ti asüba sülen yimti ketdangsertemi yimti tiyong nung aliba Deer Park shibangogo. Yimti nung aliba Zoo nung ozü teku asüba sülen Delhi Zoo-a shibangogo.

New Delhi, October 21 (Agencies): Delhi nung Bird flu ajanga ano ozü ti süogo, iba sülen ketdangsertemi Deer Park shibangtsüba den külemi nisungtem dang ozü tasü nung mekongshitsüla ta metetdaktsüogo.
Delhi Zoo aser Deer Park nung ozü anana asü, zoo anasa Sundar Nagar nung ozü tasü asem angu aser Tughlakabad nung ozü tasü ka angu.
Iba dak sentakba nung Delhi Animal Husbandry Minister, Gopal Rai-i, taoba hopta nungi tenzüka tang tashi nung yimti nung ozü 18 süogo, ta metetdaktsü.
“Iba tensa tamajungba makümdang azüoktsü atema onoki inyakdar. Tang atemabo, sensotemi shisa mebolutsüla, ajisüaka kanga kümdanga alitsüla,” ta pai ashi.
“Sensotemi ozü tasü nung mekongshitsüla, saka Helpline ajanga Animal Husbandry Department nem metetdaktsütsü ni mepishir,” ta paisa ashi.
Ozü asüba ya avian/bird flu adokdaktsüba H5 influenza virus ajanga lir, ta bushitetogo.
Rai-i ashiba agi, iba zoo aser yimti nung aliba ozü sanctuary balala aser an ayokba  markets nungi samples 50 tendangtsü atema laboratory temi yokogo.
Mongolbarnü Delhi nung zoo anaprong shibanga liasü aser yashi Deer Park-a shibangogo.
Bird flu osang tongteprateptsü aser teyari meshitsü atema Delhi sorkari Bodhbarnü Helpline (011-2389 0318) agütsüogo.
Delhi sorkari department balala den tongtepratepa inyaktsü asoshi züngsem 23-i akumba committee ka tentetogo, aser iba committee nung tongtiji Development Commissioner, Sandeep Kumar asütsü.
October 14 nü Delhi zoo nung tangalen nungi aruba ozü ana asü, iba sülen anogo ka lir ano ozü trok asü. Iba sülen October 17 nü aser 19 nü ozü kaka asü.
Ozü ti indang samples tendangtsü atema Jalandhar aser Bhopal nung aliba laboratory temi yok, aser item ozütem nung H5 influenza virus aliba jangjaogo.